जितेंद्र आव्हाड यांचा राजीनामा शरद पवार स्वीकारणार का? अजित पवार म्हणतात….

ठाणे : राष्ट्रवादी काँग्रेसचे नेते जितेंद्र आव्हाड यांच्यावर भाजपच्या एका महिला पदाधिकाऱ्याने केलेल्या विनयभंगाच्या आरोपांमुळे त्यांनी आपल्या आमदारकीचा राजीनामा दिलाय. त्यांच्या राजीनाम्यानंतर राष्ट्रवादी काँग्रेसचे प्रदेशाध्यक्ष जयंत पाटील यांनी ठाण्यात येऊन त्यांची भेट घेतली होती. त्यांनी आव्हाडांना समजावण्याचा प्रयत्न केला. त्यांच्यापाठोपाठ विरोधा पक्षनेते अजित पवार हे सुद्धा पुण्याहून जितेंद्र आव्हाड यांच्या भेटीसाठी ठाण्यात दाखल झाले. त्यांनी आव्हाडांसोबत बातचित करुन नंतर एकत्र पत्रकार परिषद घेतली. यावेळी आव्हाड खरंच राजीनामा देणार का? पक्षाकडून राजीनामा स्वीकारला जाईल का? या प्रश्नांवर अजित पवार यांनी स्पष्ट शब्दांत उत्तर दिलं.

“जितेंद्र आव्हाड हे राष्ट्रवादी काँग्रेसचे अध्यक्ष शरद पवार यांना दैवत मानतात. त्यांनी राजीनामा द्यावा का याबाबत शरद पवार यांचा शेवटचा निर्णय असेल. तोच निर्णय जितेंद्र आव्हाड मान्य करतील, त्यांना पटो किंवा नको, साहेबांचा शब्द म्हणून ते मान्य करतील”, अशी रोखठोक भूमिका अजित पवार यांनी मांडली.

विशेष म्हणजे जयंत पाटील यांनीदेखील जितेंद्र आव्हाड यांना राजीनाम्याचा निर्णय मागे घ्यावा, असा आग्रह केलाय. त्यामुळे जितेंद्र आव्हाड नेमकी काय भूमिका घेतात याकडे राज्याचं लक्ष लागलं आहे.

दरम्यान, जितेंद्र आव्हाड यांनी आपला राजीनामा जयंत पाटील यांच्याकडे सुपूर्द केलाय. पण पक्षातील सर्व नेत्यांची त्यांनी राजनामा देऊ नये, अशी भूमिका आहे.

अजित पवार काय-काय म्हणाले?

कुठेही विनयभंग झाल्याचं दिसत नाहीय.

जितेंद्र आव्हाड यांनी त्यांच्यावर करण्यात आलेल्या आरोपांमुळे नाराज होऊन राजीनामा दिलाय.

जितेंद्र आव्हाडांवर 72 तासांत दोन गुन्हे दाखल केले.

विरोधकांचा आवाज दाबण्याचा प्रयत्न आहे.

मुख्यमंत्र्यांनी याबाबत सांगायला हवं होतं.

या प्रकरणी वेळ जाईल तसा सूत्रधार कोण ते समोर येईल.

खरंतर जितेंद्र आव्हाडांविरोधात हे षडयंत्र आहे.

पोलीसही दबावाखाली वागत आहेत.

हा लोकप्रतिनिधीला अडचणीत आणण्याचा प्रयत्न आहे.

आम्ही जितेंद्र आव्हाडांच्या पाठिशी आहोत.

पोलिसांनी दबावाला बळी पडू नये.

जितेंद्र आव्हाडांनी राजीनाम्याबाबतचं ट्विट मागे घ्यावं.