Ulhasnagar Municipal School : उल्हासनगरात महापालिका शाळांची दुरावस्था, मनसे विद्यार्थी सेनेचा आंदोलनाचा इशारा
उल्हासनगर महापालिकेच्या प्रभाग समिती 1 अंतर्गत बिर्ला गेट परिसरातील तानाजी नगरमध्ये उल्हासनगर महापालिकेची शाळा क्रमांक 23 आणि 26 या दोन शाळा आहेत. या शाळांकडे महापालिकेचं लक्षच नसल्यानं शाळांची अवस्था बिकट झाली आहे.
उल्हासनगर : उल्हासनगरमध्ये महापालिके (Ulhasnagar Municipality)च्या दोन शाळांची सध्या अतिशय बिकट अवस्था झाली आहे. त्यामुळे विद्यार्थ्यांना अक्षरशः जीव मुठीत घेऊन शिक्षण घेण्याची वेळ आली आहे. शाळेतील सिलिंग कोसळत असून पत्रेही फुटले आहेत. शाळेची इमारत अखेरची घटका मोजत आहे. मात्र महापालिका प्रशासन शाळा (School) दुरुस्त करण्याचे नावच घेताना दिसत नाही. सध्या मान्सून जोरदार बरसत आहे. त्यात शाळेची इमारत जीर्ण होत आली असून यामुळे दुर्घटना (Incident) घडण्याची शक्यता आहे. काही दुर्घटना घडल्यास महापालिका शाळेत शिकत असणाऱ्या विद्यार्थ्यांच्या सुरक्षेचा प्रश्न ऐरणीवर आहे. त्यामुळं मनसेनं याविरोधात आंदोलनाचा इशारा दिला.
विद्यार्थ्यांना जीव मुठीत घेऊन शिक्षण घ्यावं लागतंय
उल्हासनगर महापालिकेच्या प्रभाग समिती 1 अंतर्गत बिर्ला गेट परिसरातील तानाजी नगरमध्ये उल्हासनगर महापालिकेची शाळा क्रमांक 23 आणि 26 या दोन शाळा आहेत. या शाळांकडे महापालिकेचं लक्षच नसल्यानं शाळांची अवस्था बिकट झाली आहे. शाळेच्या आवारात महापालिकेचं भंगार साहित्य पडलं आहे. वर्गांमध्ये पत्रे फुटलेले असल्याने सिलिंग कोसळलेल्या अवस्थेतच आहेत. पिण्यासाठी पाण्याची व्यवस्था नाही. अशा परिस्थितीत विद्यार्थ्यांना जीव मुठीत घेऊन शिक्षण घ्यावं लागतंय. शाळेतील या समस्या महापालिकेनं लवकरात लवकर सोडवल्या नाहीत, तर मनसे स्टाईलने आंदोलनाचा इशारा मनसेचे शहर संघटक मैनुद्दीन शेख आणि मनसे विद्यार्थी सेनेचे शहर उपाध्यक्ष कल्पेश माने यांनी दिला आहे. त्यामुळं महापालिका या शाळांकडे लक्ष देते का? हे आता पाहावं लागणार आहे. (Bad condition of municipal schools in Ulhasnagar, MNS Vidyarthi Sena warns of agitation)
