Tukaram Mundhe: मुंढे इफेक्ट, दादरच्या प्रसिद्ध वडापाव विक्रेत्याचे धाबे दणाणले, लगेच केला बदल

Tukaram Mundhe FDA: महाराष्ट्रात सुरू असलेली अन्न सुरक्षा मोहीम आणि धाडी हा आता फक्त राज्याभरापुरतीचा विषय राहिलेला नाही आता तो देशभरात चर्चेचा विषय बनला आहे. या कारवाईच्या केंद्रस्थानी आयएएस अधिकारी, महाराष्ट्र अन्न व औषध प्रशासन (एफडीए) आयुक्त तुकाराम मुंडे आहेत. मे महिन्यात एफडीए आयुक्तपदाची सूत्रे स्वीकारल्यापासून त्यांनी अन्न सुरक्षेचे उल्लंघन आणि अस्वच्छ अन्न उत्पादनांविरोधात आक्रमक मोहीम सुरू केली आहे. ते मुंबईसह संपूर्ण महाराष्ट्रातील रेस्टॉरंट, हॉटेल्स, गोदामे आणि खाद्यपदार्थांच्या दुकानांवर सातत्याने कारवाई करत आहेत.

रॉयटर्सच्या वृत्तानुसार, तुकाराम मुंडे आयुक्त झाल्यापासून गेल्या तीन महिन्यांत महाराष्ट्र अन्न व औषध प्रशासनाने (FDA) ३,००० हून अधिक छापे आणि तपासण्या केल्या आहेत. या कारवाईमुळे डॉमिनोजची चार आणि पिझ्झा हटच्या एका आउटलेटसह अनेक प्रमुख खाद्य व्यवसायांचे परवाने रद्द करण्यात आले आहेत. तुकाराम मुंडे यांनी क्रिकेट क्लब, लोकप्रिय रेस्टॉरंट, हॉटेल्स आणि इतर नामांकित आस्थापनांसह कोणालाही सोडले नाही. सर्वत्र छापे टाकले जात आहेत.

आता तुकाराम मुंढे यांच्या कारवाईला सगळेच अन्नविक्रेते घाबरले आहेत. प्रत्येकांच्या मनात एकच भीती आहे की पुढचा नंबर आपला नसावा. अनेक प्रसिद्ध आऊटलेटसवरही धाडी पडल्याने लोकही चकित झाले आहेत. अनेक अन्न विक्रेत्यांनी आता स्वच्छेतेकडे विशेष भर दिली आहे. आता यातच मुंबईकरांचा फेव्हरेट असलेला वडपावबद्दल एक बातमी समोर आली आहे. दादरचा फेम स्वामी समर्थ वडापाव विक्रेत्याने आता एक महत्त्वाचे पाऊल उचलले आहे.

दादरमधील ‘स्वामी समर्थ’ वडापाव स्टॉलवर दिसणार मोठा बदल

मुंबईतील वडापाव विक्रेत्यांमध्ये तुकाराम मुंढेंची चांगलीच धास्ती पसरल्याची पाहायला मिळत आहे. आता वडापाव विक्रेते हे हायजिन मेंटेन करुन वडापाव विकत आहे. वडापाव विक्रिसाठी नवे नियम लागू केले आहेत. या नियमानंतर दादरच्या शिवसेना भवन जवळील प्रख्यात श्री स्वामी समर्थ वडापाव स्टाॅलवर आता एक बदल पाहायला मिळणार आहे. स्टॉलवर वडापाव बांधून देण्यासाठी आता वृत्तपत्राचा वापर न करता  बटर पेपरचा वापर सुरु आहे. तर विक्रेत्यांकडून डोक्यावर सेफ्टी कॅप वापरायला सुरुवात झाली आहे.