मत दिलं, आता लग्न लावून देणार! भाजप आमदार शोधणार तरुणांसाठी बायको, केली मोठी घोषणा

निवडणुकीच्या काळात उमेदवार वीज, पाणी, रस्ते आणि रोजगार याबाबत आश्वासने देत असतात. मात्र आता हरियाणातील एक भाजप महिला आमदार निवडणुकीदरम्यान दिलेल्या एका वेगळ्याच आश्वासनामुळे चर्चेत आली आहे. आमदार बिमला चौधरी यांनी निवडणुकीच्या काळात तरुणांचे लग्न लावण्याची जबाबदारी घेण्याचे जाहीर केले होते. आता भाजपने रेवाडी नगर परिषद निवडणुकीत मोठा विजय मिळाल्यानंतर हे आश्वासन पूर्ण करण्यासाठी पुढाकार घेतला आहे. त्यांनी अविवाहित तरुणांना आपला बायोडाटा घेऊन भेटण्याचे आवाहन केले आहे. याबाबत सविस्तर माहिती जाणून घेऊयात.

भर सभेत लग्न लावून देण्याची घोषणा

रेवाडी नगर परिषद निवडणुकीत भाजपाच्या उमेदवार विनिता पीपल यांनी दणदणीत विजय मिळवला. या विजयानंतर आयोजित आभार सभेत आमदार बिमला चौधरी यांच्यासोबत हरियाणाच्या आरोग्यमंत्री आरती राव देखील उपस्थित होत्या. यावेळी बोलताना बिमला चौधरी यांनी म्हटले की, ‘निवडणूक प्रचारात मी जे वचन दिलं होतं, त्यावर आजही ठाम आहे. तुमच्या ओळखीतील एखादा मुलगा अविवाहित असेल, तर त्याचा बायोडाटा माझ्याकडे आणा. आम्ही आधीही अनेक मुलींची लग्नं लावून दिली आहेत. आता उरलेल्या अविवाहित मुलांचं घर बसवण्याची जबाबदारीही माझीच आहे.’

प्रचारसभेतच उघडलं होतं ‘मॅरेज ब्युरो’

आमदार बिमला चौधरी यांच्या या आश्वासनाची सुरुवात रेवाडी नगर परिषद निवडणुकीच्या प्रचारसभेत झाली होती. एका जाहीर सभेत बिमला चौधरी यांनी महिलांना आणि युवकांना संबोधित करताना म्हटले होते, ‘तुम्ही विनीता पीपल यांना मोठ्या मतांनी विजयी करा. शहर विकासाची जबाबदारी आमची आहेच, पण ज्या युवकांची लग्नं होत नाहीत, त्यांचं लग्न लावून देण्याची हमीही मी देते.’ चौधरी यांच्या या वक्तव्यानंतर संपूर्ण सभेत हशा पिकला होता.

बिमला चौधरी यांचा राजकीय प्रवास

बिमला चौधरी या हरियाणा भाजपातील चर्चित चेहरा मानल्या जातात. त्या पटौदी (SC राखीव) मतदारसंघातून दुसऱ्यांदा आमदार बनल्या आहेत. 2014 मध्ये पहिल्यांदा निवडून येताना त्यांनी स्वतःला निरक्षर असल्याचे प्रतिज्ञापत्रात नमूद केले होते. मात्र, 2018 मध्ये त्यांनी NIOS मधून दहावीची परीक्षा उत्तीर्ण केली. त्यानंतर 2024 च्या निवडणुकीत त्यांनी काँग्रेसच्या उमेदवार पर्ल चौधरी यांचा पराभव केला होता.