Income Tax Raid | 40 मशीन तीन दिवसांपासून मोजताय नोटा, आतापर्यंत 250 कोटी, अजून किती बाकी…

नवी दिल्ली | 9 डिसेंबर 2023 : काँग्रेसचे राज्यसभा खासदार धीरज प्रसाद साहू यांच्याकडे आयकर विभागाचे छापे पडले होते. सहा डिसेंबर रोजी ओडिशा आणि झारखंडमध्ये हे छापे टाकण्यात आले होते. या छाप्यात सापडलेल्या रक्कमेची मोजणी तीन दिवसांपासून सुरु आहे. 40 मशीन नोटा मोजत आहेत. तरीही अजून नोटा मोजणी पूर्ण झाली नाही. आतापर्यंत 250 कोटी रुपयांची मोजणी पूर्ण झाली आहे. अजून 136 पॅकेटची मोजणी राहिली आहे. यामुळे हा आकडा 500 कोटी रुपयांपर्यंत जाण्याची शक्यता आहे.

तीन सुटकेस भरुन ज्वेलरी

बौध डिस्टिलरीज प्रायव्हेट लिमिटेड (बीडीपीएल) ही कंपनी मद्य बनवणारी आहे. आयकर विभागाने या कंपनीशी संबंधित ठिकाणांवर छापे टाकले. या छाप्यात मोठ्या प्रमाणावर बेहिशेबी रक्कम मिळाली आहे. तपास संस्थांना आतापर्यंत मिळालेली ही सर्वात मोठी रक्कम आहे. ओडिशामधील सरकारी बँकेचे कर्मचारी तीन दिवसांपासून 40 मशीनवर मोजणी करत आहे. अजून 250 कोटी रक्कम मोजली गेली आहे. तसेच या ठिकाणी तीन सुटकेस भरुन ज्वेलरी मिळाली आहे. यामुळे ही सर्व रक्कम 500 कोटींपर्यंत जाण्याची शक्यता आहे.

आयकर विभागाचे शंभर अधिकारी

आयकर विभागातील 100 अधिकारी चौथ्या दिवशीही थांबले आहे. बँकेचे कर्मचारी 40 मशीनवर सतत मोजणी करत आहेत. अजून 136 पॅकेट मोजणे बाकी आहे. आतापर्यंत केवळ 40 पॅकेटची मोजणी झाली आहे. आयकर अधिकाऱ्यांना एकूण 176 बॅग मिळाल्या होत्या. छाप्यात मिळालेल्या जास्तीत जास्त नोटा 500 रुपयांच्या आहेत.

हा पैसा काँग्रेस नेत्यांच्या – भाजप

आयकर छाप्यात मिळत असलेला पैसा हा काँग्रेस नेत्यांचा असल्याचा आरोप भाजपकडून केला जात आहे. भाजपचे खासदार संजय सेठ यांनी आतापर्यंत ३०० कोटी जप्त झाल्याचा दावा केला आहे. नोटा मोजताना मशीन खराब होत आहे, परंतु पैसे संपत नाही, असे त्यांनी म्हटले आहे. साहू यांच्याकडे हे पैसे कुठून आले, हे राहूल गांधी आणि सोनिया गांधी यांनी सांगावे, असे खासदार सेठ यांनी म्हटले आहे.