दिल्लीतून मोठी बातमी! कनॉट प्लेसमधील दुकाने 6.30 वाजता बंद होणार, NDMC कडून आदेश जारी
Delhi Protest Update : दिल्लीतील कनॉट प्लेस परिसरातील सर्व दुकाने, कार्यालये आणि रेस्टॉरंट्स आज (गुरुवार) सायंकाळी 6.30 वाजेपर्यंत बंद करण्याची अधिसूचना जारी करण्यात आली आहे. याबाबत माहिती जाणून घेऊयात.
राजधानी दिल्लीत गेल्या एका महिन्यापासून शिक्षणमंत्री धर्मेंद्र प्रधान यांच्या राजीनाम्यासाठी आंदोलन सुरू आहे. मात्र गेल्या काही काळापासून दिल्लीतील आंदोलनाला वेगळे वळण लागले आहे, त्यामुळे दिल्लीच्या काही भागात तणावाचे वातावरण सुरू आहे. अशातच आता दिल्लीतील कनॉट प्लेस परिसरातील सर्व दुकाने, कार्यालये आणि रेस्टॉरंट्स आज (गुरुवार) सायंकाळी 6.30 वाजेपर्यंत बंद करण्याची अधिसूचना जारी करण्यात आली आहे. नवी दिल्ली ट्रेडर्स असोसिएशन (NDTA)ने याबाबत परिपत्रक जारी केले आहे. याबाबत सविस्तर माहिती जाणून घेऊयात.
NDTA कडून अधिसूचना जारी
नवी दिल्ली महानगरपालिकेच्या अध्यक्षा आणि उपाध्यक्षा यांनी दूरध्वनीवरून दिलेल्या सूचनेनंतर हा निर्णय घेण्यात आला. कनॉट प्लेस परिसरातील सध्याची परिस्थिती लक्षात घेता सर्व व्यावसायिक आस्थापनांनी या सूचनांचे काटेकोर पालन करावे, असे आवाहन करण्यात आले आहे. NDTA ने आपल्या परिपत्रकात सर्व दुकानदार, कार्यालये आणि रेस्टॉरंट चालकांना सायंकाळी 6.30 वाजेपर्यंत आपली दुकाने बंद ठेवण्याचे आवाहन केले आहे. कोणतीही अप्रिय घटना टाळण्यासाठी, मालमत्तेचे नुकसान किंवा कोणालाही दुखापत होऊ नये यासाठी या सूचनांचे पालन करणे आवश्यक असल्याचे सांगण्यात आले आहे.
NDTA चे अध्यक्ष अतुल भार्गव यांनी जारी केलेल्या या परिपत्रकात सर्व व्यावसायिकांनी प्रशासनाला सहकार्य करून सूचनांचे काटेकोर पालन करावे, असे म्हटले आहे. या निर्णयामागचा उद्देश नागरिकांची सुरक्षितता सुनिश्चित करणे आणि कोणत्याही प्रकारचे नुकसान टाळणे हा असल्याचेही स्पष्ट करण्यात आले आहे. जंतर-मंतर परिसरात कॉकरोच जनता पार्टीकडून सुरू असलेल्या आंदोलनाच्या पार्श्वभूमीवर हा निर्णय घेण्यात आला आहे.
दिल्ली पोलिसांनी काय म्हटले?
कनॉट प्लेसमधील दुकाने वेळेआधी बंद करण्याच्या सूचनेदरम्यान राष्ट्रीय सुरक्षा कायदा (NSA) अंतर्गत दिल्ली पोलिसांच्या प्रतिबंधात्मक नजरकैदेच्या अधिकारात वाढ करण्यात आली आहे. दिल्लीचे उपराज्यपाल यांनी दिल्ली पोलिसांना NSA अंतर्गत प्रतिबंधात्मक नजरकैदेचे अधिकार 18 ऑक्टोबरपर्यंत वाढवून दिले आहेत. मात्र, दिल्ली पोलिसांनी स्पष्ट केले आहे की हा निर्णय CJP च्या आंदोलनाला दडपण्यासाठी घेतलेला नाही. पोलिसांच्या मते ही एक नियमित प्रशासकीय प्रक्रिया आहे. काही माध्यमांनी या आदेशाचा संबंध सध्याच्या आंदोलनाशी जोडत चुकीचा संदर्भ दिल्याचेही पोलिसांनी म्हटले आहे.
