Sanjay Raut : पुणे, अमरावती, नाशिकमध्ये १०-१० हजार रुपये वाटले; संजय राऊतांचा खळबळजनक दावा

विधानपरिषद निवडणुकांचे निकाल येत असताना, शिवसेना (उद्धव बाळासाहेब ठाकरे) नेते संजय राऊत यांनी नागपूरमध्ये “काटे की टक्कर” असल्याचे म्हटले आहे. या निवडणुकीचे निकाल महाविकास आघाडीसाठी आशादायी असल्याचे चित्र आहे, असे राऊत यांनी नमूद केले. पुण्यातल्या पदवीधरांनी चांगला मार्ग दाखवल्याचे त्यांचे मत आहे.

शिक्षक मतदारसंघामध्ये मतदारांना पैसे वाटले गेल्याचे गंभीर आरोप राऊत यांनी केले. पुणे, अमरावती आणि नाशिकमध्ये दहा-दहा हजार रुपये वाटून मते विकत घेतल्याचा दावा त्यांनी केला. ही परंपरा गेल्या दहा वर्षांत सुरू झाली असून, शिक्षकांनी आपल्या पेशाला जागले पाहिजे, अशी अपेक्षा त्यांनी व्यक्त केली.

राऊत यांनी बॅलेट पेपरच्या वापराचे समर्थन करत म्हटले की, जिथे बॅलेट पेपरवर निवडणुका होतात, तिथे हुकूमशहाचा पराभव होतो. मुख्यमंत्री खोटे बोलत असून, त्यांनी शेतकऱ्यांची चेष्टा करू नये, अशी टीका राऊत यांनी केली. दहा-दहा हजार रुपयांना मते विकत घेणारे आणि पन्नास-पन्नास कोटींना आमदार-खासदार खरेदी करणारे, शेतकऱ्यांना ५००० रुपये देऊन चेष्टा करत असल्याचे राऊत म्हणाले.