CJP च्या आंदोलनामुळे दिल्लीत हाय अलर्ट; संपूर्ण शहरात 5000 सुरक्षा जवान तैनात, प्रतिबंधात्मक आदेशही लागू

संसदेच्या पावसाळी अधिवेशनाला आजपासून सुरूवात होणार आहे. या अधिवेशनच्या पहिल्याच दिवशी कॉकरोच जनता पार्टीचा मोर्चा धडकणार आहे. या आंदोलनात हजारो तरुण सहभागी होणार असल्याची माहिती मिळतेय. आंदोलनाच्या पार्श्वभूमीवर दिल्ली हाय अलर्ट जारी करण्यात आला आहे. तर 5000 हून अधिक सुरक्षा जवानांना तैनात केलं आहे. यात निमलष्करी जवानांचाही समावेश आहे.

कॉकरोच जनता पार्टी राजीनाम्यासाठी आक्रमक 

नवी दिल्लीला 15 सुरक्षा झोनमध्ये विभागण्यात आलं आहे. संसद, इंडिया गेट, VVIP परिसरात पोलिसांचं विशेष लक्ष असणार आहे. दिल्ली पोलिसांनी BNSS च्या 163 कलमांतर्गत प्रतिबंधात्मक आदेशही लागू केले आहेत. कॉकरोच जनता पार्टी नीट पेपरफुटीवरून केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी आक्रमक झाली आहे. कॉकरोच जनता पार्टीच्या ‘संसद मार्च’च्या पार्श्वभूमीवर दिल्लीचे पोलीस उपायुक्त सचिन शर्मा यांनी रविवारी एक सूचना जारी करत म्हटलं की, ‘दिल्ली पोलीस हे स्पष्टपणे सांगत आहे की, ‘आमच्याकडे कोणत्याही निषेध मोर्चासाठी परवानगी मागण्यात आलेली नाही. तसेच आम्ही कोणतीही परवानगी दिलेली नाही’.

मोर्चापासून दूर राहण्याचे नागरिकांना पोलिसांचे आवाहन 

पोस्टमध्ये पुढे म्हटलं की, ‘जंतर-मंतर वगळता कोणत्याही ठिकाणी मोर्चा, आंदोलन करू नये. कोणत्याही ठिकाणी आंदोलनासाठी पाच पेक्षा अधिक लोकांच्या एकत्र येण्यास मनाई आहे. त्यासाठी पूर्वपरवानगी आवश्यक आहे’. दिल्ली पोलिसांनी नागरिकांना आवाहन करत म्हटलं की, नागरिकांनी कायद्याचा आदर करावा. नागरिकांनी मोर्चामध्ये सहभागी होण्यापासून दूर राहावे. शहरात सार्वजनिक शांतता आणि सुरक्षा राखण्यासाठी सहकार्य करावे, असं पोस्टमध्ये म्हटलं आहे.

पोलिसांचा शहरात बंदोबस्त 

पोलिसांनी नागरिकांना मोर्चामध्ये सहभागी न होण्याचं आवाहन केलं आहे. तसेच प्रतिबंधात्मक आदेशांचे पालन करावे आणि सार्वजनिक शांतता, सुरक्षेसाठी सहकार्य करावे, असं त्यांनी पुढे म्हटलं आहे. सुरक्षेच्या पार्श्वभूमीवर अतिरिक्त पोलीस देखील तैनात करण्यात आले आहेत. बॅरिकेड्स लावले आहेत. महत्त्वाच्या प्रवेशद्वारांवर वाहनांची तपासणी केली जात आहे.  पोलिसांकडून कालपासून सर्वत्र देखरेख केली जात आहे.