धर्मेंद्र प्रधान आणि निर्मला सीतारामन यांनी पुरीतील ‘मेरी मिट्टी, मेरा देश’ कार्यक्रमात घेतला सहभाग

मुंबई | केंद्रीय मंत्री धर्मेंद्र प्रधान आणि अर्थमंत्री निर्मला सीतारामन आज ओडिशा दौऱ्यावर आहेत. पुरी येथील ‘मेरी माती, मेरा देश’ मोहिमेत ते सहभागी झाले होते. या मोहिमेअंतर्गत त्यांनी ‘प्लांटेशन ड्राइव्ह’ आणि ‘पंच प्राण प्रतिज्ञा’ कार्यक्रमात सहभाग घेतला. यावेळी त्यांच्यासोबत भाजप नेते संबित पात्राही उपस्थित होते. त्याआधी दोन्ही मंत्री जगन्नाथ मंदिरात पोहोचले. येथे त्यांनी भगवान जगन्नाथाचे दर्शन घेतले.

निर्मला सीतारामन आणि धर्मेंद्र प्रधान या दोघांनी ओडिशाचे प्रसिद्ध वाळू कलाकार सुदर्शन पटनायक यांची भेट घेतली. याशिवाय पुरी येथील केंद्रीय संस्कृत विद्यापीठात आयोजित ‘पंच प्राण प्रतिज्ञा’ कार्यक्रमात त्यांनी सहभाग घेतला. येथे त्यांनी शूर स्वातंत्र्यसैनिकांच्या कुटुंबियांचा गौरव केला. सुदर्शन पटनायक यांनी पुरी बीचवर ‘मेरी माती मेरा देश’ या थीमवर एक कलाकृती तयार केली होती.

भारत 2047 पर्यंत विकसित देश होईल

या कार्यक्रमादरम्यान निर्मला सीतारामन म्हणाल्या की, परकीयांच्या गुलामगिरीच्या काळात आपल्यात जी मानसिकता रुजली आहे, ती दूर करणे अत्यंत आवश्यक आहे. तरच भारत 2047 पर्यंत विकसित देश बनेल आणि भारताचा अभिमान वाटेल असे वातावरण निर्माण होईल.

मेरी माती, मेरा देश’ कार्यक्रम काय आहे?

पीएम मोदींनी ‘मन की बात’ कार्यक्रमात ‘मेरी मिट्टी, मेरा देश’ या कार्यक्रमाची घोषणा केली होती. याची सुरुवात 9 ऑगस्टपासून झाली असून ही मोहीम 30 ऑगस्टपर्यंत चालणार आहे. देशासाठी बलिदान देणाऱ्या शूर स्वातंत्र्यसैनिकांचा आणि वीरांचा सन्मान करणे हा या मोहिमेचा उद्देश आहे. या शूर सैनिकांच्या स्मरणार्थ देशभरात या कार्यक्रमांचे आयोजन करण्यात येणार आहे.