SIR विरोधातील आंदोलनात ध्रुव राठी सहभागी होणार! पण कधी अन् कुठे? नवीन व्हिडिओत सगळंच सागितलं

अभिनेते आणि सामाजिक कार्यकर्ते प्रकाश राज यांनी बंगळूरुमध्ये एसआयआरच्या विरोधात सुरू असलेल्या आंदोलनात अधिक लोकांनी सामील होण्याचे आवाहन केले होते. त्यांनी बुधवारी सकाळी सोशल मीडियावर एक व्हिडिओ पोस्ट करून आंदोलनात एक विशेष पाहुणे उपस्थित राहणार असल्याची घोषणा केली होती. यानंतर एका व्हिडिओमध्ये त्यांनी त्या पाहुण्याचे नाव उघड केले आहे. त्यांनी सांगितले की, ध्रुव राठी या आंदोलनात सहभागी होणार आहे. यानंतर प्रकाश राज यांनी सिंघममधील डायलॉग बोलत ज्ञानेश कुमारांना थेट आव्हान दिलं आहे.

ध्रुव राठीच्या उपस्थितीची घोषणा करताना प्रकाश राज म्हणाले, आज सकाळच्या व्हिडिओमध्ये मी एका विशेष पाहुण्याची ओळख करून देण्याचे वचन दिले होते. एक कणखर आवाज. बंगळूरमधील फ्रीडम पार्कमध्ये आमच्यासोबत सामील होणारे दुसरे कोणी नसून ध्रुव राठी आहे. ध्रुव राठी पहिल्यांदाच बंगळूरमध्ये आले आहेत. एसआयआर प्रक्रिया रद्द करण्याच्या मागणीसाठीच्या या आंदोलनात ते आमच्यासोबत असतील. आली रे आली ज्ञानू आता तुझी पाळी आली, असं म्हणत प्रकाश राज यांनी कुमारांवर निशाणा साधला आहे.

त्यानंतर प्रकाश राज यांनी अधिक लोकांना आंदोलनात सामील होण्याचे आवाहन केले. ते म्हणाले, मोठ्या संख्येने या. तिथे उपस्थित असलेल्या ओइशीच्या पाठीशी उभे राहा. ओइशी घोष तिथे असेल, नेहा बोरा तिथे असेल. विविध युवा संघटना तिथे असतील. नागरी समाजाचे प्रतिनिधी तिथे असतील. कर्नाटकाच्या विविध जिल्ह्यांमधून या प्रक्रियेमुळे प्रभावित झालेले लोकही तिथे असतील. चला, आपण सर्व एकत्र उभे राहूया.

कॉकरोच जनता पक्षाचे संस्थापक अभिजित दीपके ८ ऑक्टोबर रोजी बंगळूरमधील फ्रीडम पार्कमध्ये एका आंदोलनाचे नेतृत्व करणार आहेत. हे आंदोलन सकाळी १०:३० वाजता सुरू होईल. प्रकाश राज यांच्यासोबत विविध संघटनांचे सदस्य आणि स्थानिक रहिवासीही या कार्यक्रमाला उपस्थित राहण्याची शक्यता आहे. यापूर्वी एसआयआर प्रक्रियेबद्दल प्रकाश राज म्हणाले, “हा केवळ मतदानाचा प्रश्न नाही. हा लोकशाही आणि संविधानावर हल्ला करण्याचा प्रयत्न आहे. त्यामुळे मोठ्या संख्येने या.”