3500 तासांचं उड्डाण, कारगिलचा अनुभव अन्…; नवे IAF चीफ आशुतोष दीक्षित नेमके आहेत तरी कोण? जाणून घ्या…
Air Marshal Ashutosh Dixit News: एअर मार्शल आशुतोष दीक्षित यांची भारतीय हवाई दलाचे नवे प्रमुख म्हणून नियुक्ती करण्यात आली आहे. ते २९ वे हवाई दल प्रमुख असतील.
निष्णात लढाऊ वैमानिक एअर मार्शल आशुतोष दीक्षित यांची भारतीय हवाई दलाचे नवे प्रमुख म्हणून नियुक्ती करण्यात आली आहे. राष्ट्रपती द्रौपदी मुर्मू यांनी त्यांच्या नियुक्तीला मंजुरी दिली आहे. ते ३१ ऑक्टोबर २०२६ पासून एअर चीफ मार्शल पदाचा कार्यभार स्वीकारतील. ते सध्याचे एअर चीफ मार्शल अमर प्रीत सिंग यांची जागा घेतील. संरक्षण मंत्रालयाने जारी केलेल्या पत्रानुसार, राष्ट्रपतींनी एअर मार्शल आशुतोष दीक्षित यांच्या भारतीय हवाई दलाचे पुढील प्रमुख म्हणून नियुक्तीला मंजुरी दिली आहे.
अधिकृत आदेशानुसार, आशुतोष दीक्षित यांचा कार्यकाळ ३१ डिसेंबर २०२८ पर्यंत असेल. याचा अर्थ ते अंदाजे दोन वर्षे आणि दोन महिने भारतीय हवाई दलाचे नेतृत्व करतील. एअर मार्शल आशुतोष दीक्षित हे भारतीय हवाई दलातील एक प्रसिद्ध लढाऊ वैमानिक आहेत. त्यांना ऑपरेशनल आणि कमांड रोल्सचा व्यापक अनुभव आहे. त्यांना परम विशिष्ट सेवा पदक, अति विशिष्ट सेवा पदक, वीर पदक, आणि विशिष्ट सेवा पदक प्रदान करण्यात आले आहेत.
संरक्षण मंत्रालयाच्या माहितीनुसार, आशुतोष दीक्षित यांनी तीन दशकांहून अधिक काळ चाललेल्या आपल्या कारकिर्दीत ३,५०० तासांहून अधिक उड्डाण केले असून त्यांनी प्रमुख परिचालन आणि सामरिक पदे भूषवली आहेत. या काळात त्यांनी एचपीटी-३२, एएन-३२, एव्ह्रो, किरण, जॅग्वार, आयएल-७८, हॉक आणि तेजस यांसारखी विविध लढाऊ विमाने उडवली आहेत. नवीन हवाई दल प्रमुखांनी पाकिस्तानविरुद्धच्या १९९९ च्या कारगिल युद्धातही महत्त्वाची भूमिका बजावली होती.
९ व्या स्क्वाड्रनचे कमांडिंग ऑफिसर म्हणून त्यांनी लढाऊ विमानांमधून शत्रूच्या बंकर्सवर अचूक बॉम्बफेक केली. हवाई दलाने कारगिल युद्धादरम्यान ऑपरेशन सफेद सागर आणि ऑपरेशन रक्षक राबवले. एअर मार्शल आशुतोष दीक्षित १९८६ मध्ये भारतीय हवाई दलात फायटर स्ट्रीममध्ये कमिशन झाले. त्यांनी राष्ट्रीय संरक्षण अकादमीमध्ये प्रशिक्षण घेतले असून ते डिफेन्स स्टाफ सर्व्हिस कॉलेज (बांगलादेश) आणि राष्ट्रीय संरक्षण महाविद्यालयाचे माजी विद्यार्थी आहेत.
वायुसेनेतील त्यांच्या कार्यकाळात त्यांनी अनेक महत्त्वाच्या भूमिका बजावल्या, त्यापैकी सर्वात उल्लेखनीय म्हणजे एकात्मिक संरक्षण कर्मचारी मुख्यालयातील त्यांची भूमिका… जिथे त्यांनी लष्कर, नौदल आणि वायुसेना यांच्यातील समन्वय मजबूत केला. एअर मार्शल दीक्षित यांचा जन्म ९ डिसेंबर १९६६ रोजी झाला. ६ डिसेंबर १९८६ रोजी ते हवाई दलाच्या लढाऊ विमानांच्या शाखेत अधिकारी म्हणून रुजू झाले.
