इराणच्या पाकवरील हल्ल्यामुळे भारताचा जुना हिशोब चुकता, कुलभूषण जाधव यांच्याशी आहे कनेक्शन
Iran attack in Pakistan | इराणने पाकिस्तानात घुसून हल्ला केलाय. इराणने जैश अल अदलवर थेट एअर स्ट्राइक केला. त्यामुळे जुना हिशोब चुकता झाला आहे. सध्या पाकिस्तानी तुरुंगात भारताचे नागरीक कुलभूषण जाधव बंद आहेत, त्यांच्याशी सुद्धा जैश अल अदलच कनेक्शन आहे.
Iran attack in Pakistan | इराणने मंगळवारी पाकिस्तानातील दहशतवादी संघटना जैश अल-अदलवर एअर स्ट्राइक केला. जैश अल अदलच्या इराण सीमेवर दहशतवादी कारवाया सुरु होत्या. त्यांना पाकिस्तानची फूस होती. इराणने जैश अल-अदलवर कारवाई केली, एअर स्ट्राइक केला म्हणून पाकिस्तान खवळला आहे, पण या हल्ल्यामुळे भारताचा एक जुना हिशोब चुकता झाला आहे. जैश अल अदलनेच माजी नौदल अधिकारी आणि भारतीय नागरीक कुलभूषण जाधव यांचं अपहरण केलं होतं. जैश अल अदलच्या दहशतवाद्यांनी इराणमधून कुलभूषण जाधव यांचं अपहरण केलं होतं. त्यानंतर त्यांनी कुलभूषण यांना पाकिस्तानी गुप्तहेर संघटना ISI कडे सोपवलं.
जैश अल अदलने कुलभूषण जाधव यांना इराणच्या चाबहारमधून किडनॅप केलं होतं. त्यानंतर त्यांना पाकिस्तानात नेण्यात आलं. तिथेच कुलभूषण यांना हेरगिरीच्या खोट्या प्रकरणात अडकवण्यात आलं. पाकिस्तानी एजन्सीने कुलभूषण जाधव यांना अडकवलं होतं. तिथल्या कोर्टाने त्यांना मृत्यूदंडाची शिक्षा सुनावली. कुलभूषण जाधव अजूनही पाकिस्तानी तुरुंगात बंद आहेत. त्यांना सुखरुप परत आणण्यासाठी भारत सरकारचे प्रयत्न सुरु आहेत. आंतरराष्ट्रीय कोर्टात या संबंधीचा खटला लढला गेला. तिथे पाकिस्तानची चांगलीच वाट लागली.
भारताचे परराष्ट्र मंत्री भेटले, त्यानंतर दोन दिवसात…
भारताचे परराष्ट्र मंत्री एस. जयशंकर यांनी दोन दिवसांपूर्वी इराणचे राष्ट्रपती इब्राहिम रईसी यांची भेट घेतली होती. त्या भेटीनंतर अवघ्या 48 तासात इराणने पाकिस्तानी दहशतवादी संघटना जैश अल अदलवर मिसाइल आणि ड्रोनने हल्ला केला. या हल्ल्यामुळे भारताचा जुना हिशोब चुकता झाला आहे. कुलभूषण जाधव यांचं अपहरण करणाऱ्या पाकिस्तान आणि जैश अल अदलला मिळालेली ही शिक्षा म्हणून त्याकडे पाहिल जातय.
