Maharashtra News LIVE : CJP कडून आज ‘लहरा दो तिरंगा’ आंदोलन, दिल्लीत अभूतपूर्व सुरक्षा व्यवस्था

मुख्य निवडणूक आयुक्त ज्ञानेश कुमार यांच्या राजीनाम्यासह सीजेपी नेत्यांना अटक केल्याप्रकरणात आज दिल्लीत पक्षाने लहरा दो तिरंगा हे आंदोलन पुकारले आहे. आशुतोष रांका आणि सौरव दास यांच्या अटकेच्या निषेधार्थ हा मार्च काढण्यात येणार आहे. या तिरंगा मार्चसाठी कनॉट प्लेसमधील सेंट्रल पार्क प्रशासकीय कारणासाठी दोन दिवस बंद ठेवण्यात येणार आहे. तर दुसरीकडे इंडिया आघाडी सुद्धा ज्ञानेश कुमार यांच्या राजीनाम्यासाठी आग्रही आहे. काँग्रेस नवीन आंदोलनाची रणनीती तयार करत आहे. सुप्रीम कोर्टातही याप्रकरणी सुनावणी सुरू असून राहुल गांधी यांच्या याचिकेत मुख्य निवडणूक आयुक्तांना नोटीस बजावण्यात आली आहे. गेल्या आठवड्यात इंडिया आघाडीने जोरदार आंदोलन केले होते. दरम्यान कुठलाही अनुचित प्रकार रोखण्यासाठी पोलिस आणि सुरक्षा यंत्रणांनी दिल्लीत तगडा बंदोबस्त लावला आहे.

मुंबईत १० टक्के पाणी कुात आहे, दुष्काळाचं सावट आहे, धरणांचा पाहणी दौरा केलाय, मुंबईकरांना पाण्याची चिंता नाही मात्र पाणी जपून वापरा अशी विनंती मुंबईच्या महापौर रितू तावडे यांनी केली आहे. राज्यातील अनेक बड्या शहरात, तालुका आणि जिल्ह्याच्या ठिकाणी पाणी कपात करण्यात आली आहे. ऐन हिवाळ्यातच उन्हाळ्यात करण्यात येणारी पाणी कपात लागू झाल्याने ऐन उन्हाळ्यात काय स्थिती असेल याची चिंता नागरिकांना लागली आहे.

तर पुणे शिक्षक मतदारसंघ निवडणुकीत महायुतीत मिठाचा खडा पडला आहे. अपक्ष उमेदवार सचिन सानप यांच्यासाठी शिंदे शिवसेना बळ पुरवणार आहे. इथे मैत्रीपूर्ण लढतीचा नारा देण्यात आला आहे. अमरावतीमध्ये पण बंडखोरांनी महायुतीला नाकेनऊ आणले आहे. विधान परिषदेच्या निवडणुकीत मित्र पक्षात दिलजमाई न होण्याची राजकीय वर्तुळात मोठी चर्चा आहे. तर दुसरीकडे दुष्काळी मदतीवरून विरोधकांनी सरकारवर निशाणा साधल्यानंतर मित्र पक्ष राष्ट्रवादीनेही सरकारला घरचा आहेर दिला आहे. ही मदत पुरेशी नसल्याचे मत सुनील तटकरे यांनी मांडले आहे. यामुळे सरकारचे निर्णय सहमतीने होत नाहीत का? असा सवाल विचारल्या जात आहे. तर पुढील आठवड्यात परतीच्या पावसाची शक्यता वर्तवली जात आहे. गेल्या दोन महिन्यात पावसाच्या खंडाने शेतकरीच नाही तर प्रशासन आणि सरकारही चिंतेत आहे. परतीच्या पाऊस पडल्यास मोठा दिलासा मिळणार आहे. तर मतदार यादीत नाव नोंदणीसाठी राज्यात विशेष नोंदणी मोहिम राबवली जाणार आहे.