Narendra Modi on India | नरेंद्र मोदी यांची पुन्हा विरोधकांच्या ‘इंडिया’ आघाडीवर सडकून टीका

नवी दिल्ली | आगामी लोकसभा निवडणूक 2024 च्या पार्श्वभूमीवर केंद्र सरकारविरोधात देशातील सर्व विरोधक एकवटले आहेत. देशातील जवळपास प्रमुख 20 पेक्षा अधिक पक्ष एकत्र आले. काही दिवसांपूर्वी या विरोधी पक्षांची बैठक पार पडली. या बैठकीत विरोधकांच्या आघाडीचं यूपीएऐवजी इंडिया (INDIA) असं नामकरण करण्यात आलं. विरोधकांच्या इंडिया या आघाडीच्या नामकरणावरुन नरेंद्र मोदी यांनी पुन्हा एकदा सडकून टीका केली आहे. लोकसभेत विरोधी पक्षाने आणलेल्या अविश्वास प्रस्तावावर उत्तर देताना मोदींनी इंडिया या आघाडीवर टीका केली.

नरेंद्र मोदी म्हणाले….

“अध्यक्षजी, ही इंडिया आघाडी नाही, तर घमंडिया आघाडी आहे. सर्वांना पंतप्रधान व्हायचंय. आपण कोणत्या राज्यात कुठपर्यंत पोहचलोय, हा विचार सुद्धा या आघाडीने केलेला नाही. पश्चिम बंगालमध्ये आपण (विरोधकांना उद्देशून) टीएमसी आणि कम्युनिस्ट पार्टीच्या विरोधात आहात मात्र दिल्लीत एकत्र आहात”, अशी आठवण मोदींनी या इंडिया आघाडीला करुन दिली.

तसेच “गेल्या वर्षी केरळमधील वायनाडमध्ये ज्यांनी काँग्रेसच्या कार्यालयात तोडफोड केली त्यांच्यासोबत हे मांडीला मांडी लावून बसले आहेत”, असं म्हणत मोदींनी काँग्रेसवर हल्लाबोल केला.

“बाहेरुन लेबल बदलू शकता, मात्र मागील पापांचं काय? हेच पाप तुम्हाला घेऊन जातील.जनतेपासून तुम्ही केलेली पापं कशी लपवणार? ही पापं लपवू शकत नाही”, अशा शब्दात मोदींनी विरोधकांना त्यांच्या कर्मांची आठवण करुन देत टीका केली.

“परिस्थिती विपरीत असल्याने हातात हात घालून (विरोधी पक्ष) एकत्र आहेत. मात्र परिस्थिती बदलल्यावर विरोधक एकमेकांविरुद्ध वाईट होतील”, असंही मोदींनी म्हटलं.

विरोधकांचा सभात्याग

नरेंद्र मोदी अविश्वास प्रस्तावावर सभागृहाला संबोधित करत होते. याचवेळेस विरोधी पक्षांनी सभात्याग करत लोकसभा सभागृहातून बाहेर पडले.

दरम्यान काही दिवसांपूर्वी नरेंद्र मोदी यांनी याआधीही इंडिया आघाडीवर टीका केली होती. “ईस्ट इंडिया कंपनी आणि इंडियन मुजाहिद्दीन यांच्या नावातही इंडिया होतं, असं मोदी भाजप संसदीय पक्ष बैठकीत म्हणाले होते. तसेच “यूपीए हे नाव बदनाम झालं आहे. त्यामुळे आता विरोधकांनी त्यांच्या आघाडीला इंडिया नाव दिलं आहे. मात्र, विरोधकांची ही आघाडी इंडिया नाही तर घमंडीया आहे”, अशा शब्दात विरोधकांच्या आघाडीची खिल्ली उडवली होती.