CSEAM प्रकरणी NCPCRची मोठी कारवाई; मेटा इंडियाच्या MD आणि प्रमुख अधिकाऱ्यांना समन्स

नवी दिल्ली : सोशल मीडिया प्लॅटफॉर्मवर बाल लैंगिक शोषण आणि अत्याचाराशी संबंधित सामग्रीच्या कथित जाहिरातींच्या प्रकरणाची राष्ट्रीय बाल हक्क संरक्षण आयोगाने (NCPCR) गंभीर दखल घेतली आहे. या प्रकरणी आता NCPCRने मेटा इंडियाच्या व्यवस्थापकीय संचालक (MD) आणि प्रमुख अधिकाऱ्यांना 9 सप्टेंबर रोजी आयोगासमोर हजर राहण्याचे समन्स बजावले आहे.

बाल लैंगिक शोषण आणि अत्याचाराशी संबंधित सामग्री संदर्भातील कथित जाहिरातींचा मुद्दा उपस्थित करण्यात आला होता. या मीडिया रिपोर्टची दखल घेत NCPCRने 3 जुलै 2026 रोजी स्वतःहून या प्रकरणाची दखल घेत मेटा प्लॅटफॉर्म्स इंक.ला नोटीस बजावली होती.

या नोटिशीद्वारे आयोगाने मेटाकडून संपूर्ण प्रकरणाबाबत स्पष्टीकरण मागितले होते. त्यानंतर मेटाने सुमारे आठवड्यानंतर आयोगाकडे आपले उत्तर सादर केले. मात्र, मेटाने दिलेल्या स्पष्टीकरणानंतरही प्रकरणातील वस्तुस्थिती आणि संबंधित बाबी स्पष्ट करण्यासाठी NCPCRने या प्रकरणात स्वतंत्र चौकशी करण्याचा निर्णय घेतला आहे.

याच चौकशीच्या पुढील टप्प्यात आयोगाने मेटा इंडियाच्या व्यवस्थापकीय संचालक आणि प्रमुख अधिकाऱ्यांना 9 सप्टेंबर रोजी हजर राहण्याचे निर्देश दिले आहेत. या सुनावणीदरम्यान आयोगाकडून संबंधित आरोप, मेटाने सादर केलेले स्पष्टीकरण तसेच प्लॅटफॉर्मवर अशा प्रकारच्या कथित जाहिराती कशा दिसून आल्या, यासंदर्भात माहिती घेतली जाण्याची शक्यता आहे.