तळीरामांसाठी मोठी बातमी! दारूच्या किंमतीत वाढ होणार; प्रत्येक बाटलीवर अतिरिक्त पैसे आकारणार, पण किती अन् कुठे?

नोव्हेंबर महिन्याच्या सुरुवातीपासून तामिळनाडूमध्ये दारू खरेदी करणाऱ्यांना त्यांच्या खिशावर अधिक भार सहन करावा लागणार आहे. राज्यात 1 नोव्हेंबर 2026 पासून दारूच्या प्रत्येक बाटलीवर 10 रुपयांचे नवीन शुल्क लागू केले जात आहे. याचा अर्थ असा की, जर तुम्ही तामिळनाडूमध्ये दारू खरेदी केली, तर तुम्हाला आता पूर्वीपेक्षा जास्त पैसे मोजावे लागतील. सरकारच्या म्हणण्यानुसार, या शुल्कातून मिळणारा निधी पर्यावरण आणि सामाजिक कल्याण प्रकल्पांसाठी वापरला जाईल.

तामिळनाडू राज्य विपणन महामंडळ हा नवीन नियम लागू करण्याच्या तयारीत आहे. ज्यानुसार भारतीय बनावटीच्या विदेशी मद्य, बिअर आणि वाईनच्या प्रत्येक किरकोळ खरेदीवर ₹10 चा पर्यावरण आणि सामाजिक कल्याण उपकर आकारला जाईल. नवीन नियमानुसार, तामिळनाडूतील दारूची दुकाने आणि परवानाधारक आउटलेट्समध्ये विकल्या जाणाऱ्या आयएमएफएल, बिअर आणि वाईनच्या प्रत्येक बाटलीवर आता ₹10 अधिक आकारले जातील.

तसेच TASMAC ने पुरवठादार आणि स्थानिक दारू उत्पादकांना त्यांच्या किंमती आणि पुरवठा व्यवस्थेमध्ये आवश्यक बदल करण्याचे निर्देश दिले आहेत. या नवीन प्रणालीमुळे ग्राहकांना काहीसा दिलासाही मिळाला आहे. TASMAC च्या म्हणण्यानुसार, ग्राहक दारूच्या रिकाम्या बाटल्या निर्दिष्ट दुकानांमध्ये परत करून ₹10 चा परतावा मिळवू शकतात. याचा अर्थ असा की, बाटली परत केल्यावर अतिरिक्त ठेव रक्कम परत मिळू शकते. ग्राहकांना निर्दिष्ट दुकाने आणि बाटली परत करण्याच्या प्रक्रियेचे पालन करावे लागेल.

नवीन प्रणाली सुलभ करण्यासाठी, TASMAC ने पुरवठादार आणि घाऊक डेपोंना बाटल्यांवर योग्य QR कोड असलेले किंमत लेबल लावण्याचे निर्देश दिले आहेत. कर्मचाऱ्यांना परवानगीशिवाय अतिरिक्त शुल्क आकारण्याविरुद्ध ताकीदही देण्यात आली आहे. रोख व्यवहारांवर लक्ष ठेवण्यासाठी पाच प्रादेशिक विभागांमध्ये स्वतंत्र बँक खातीही तयार करण्यात आली आहेत.

अधिकाऱ्याने सांगितले की, या निर्णयामुळे अतिरिक्त महसूल मिळण्याची अपेक्षा आहे, ज्याचा उपयोग राज्य सरकारतर्फे राबविण्यात येणाऱ्या पर्यावरण आणि सामाजिक कल्याण प्रकल्पांसाठी केला जाईल. नवीन दर उद्यापासून लागू होणार असल्याने तामिळनाडूच्या सर्व जिल्ह्यांमधील किरकोळ दुकाने आणि परवानाधारक आस्थापने नवीन दर लागू करण्याची तयारी करत आहेत. कामकाज सुरळीत चालावे यासाठी, TASMAC ने उत्पादक आणि घाऊक डेपोंना QR कोडसह अचूक किंमत लेबलिंग सुनिश्चित करण्याचे निर्देश दिले आहेत. कर्मचाऱ्यांना कोणतीही अतिरिक्त किंवा अनधिकृत रक्कम आकारू नये असा इशाराही देण्यात आला आहे.