मतदानाचा अधिकार धोक्यात… माजी न्यायामूर्तींचा दावा; सर्वोच्च न्यायालयाला काय केलं आवाहन?
माजी न्यायमूर्ती रोहिंटन नरीमन यांनी निवडणूक आयोगाच्या कार्यपद्धतीवर गंभीर चिंता व्यक्त केली आहे. एसआयआरमुळे मतदार यादीतून मोठ्या संख्येने नावे हटवली जात असल्याने मतदानाचा अधिकार धोक्यात आला आहे, असे ते म्हणाले. मुख्य निवडणूक आयुक्तांच्या नियुक्तीवरही त्यांनी प्रश्नचिन्ह उपस्थित केले आहेत.
एसआयआरवरून निवडणूक आयोगावर गंभीर आरोप केले जात आहेत. एसआयआरच्या नावाखाली मतदार यादीतून मतदारांचे नाव हटवले जात असून त्यांच्या मतदानाच्या अधिकाराकडे दुर्लक्ष केलं जात असल्याचा आरोप केला जात आहे. या प्रकरणी जस्टिस उज्ज्वल भुईयां यांनी सवाल केलेले असतानाच आता जस्टिस नरीमन यांनीही चिंता व्यक्त केली आहे. सर्वोच्च न्यायालयाचे माजी न्यायामूर्ती रोहिंटन फली नरीमन यांनी निवडणूक आयोगाच्या कामकाजावर गंभीर चिंता व्यक्त केली आहे. अशा पद्धतीने काम करणारा निवडणूक आयोग ठेवला जाऊ शकत नाही, असं नरीमन यांनी म्हटलं आहे.
एसआयआरमधून मोठ्या संख्येने मतदारांचे नाव हटवण्यात आले आहे. एका रिपोर्टमध्ये मुख्य निवडणूक आयुक्त इतर निवडणूक आयुक्तांचं ऐकत नसून परस्पर निर्णय घेत असल्याचं म्हटलं होतं. त्यावरून नरीमन यांनी चिंता व्यक्त केली आहे. पश्चिम बंगालमध्ये 90 लाख मतदारांचे नाव मतदार यादीतून हटवण्यात आले आहे. त्यानंतरही एसआयआरवर बंदी घालण्यासाठी सर्वोच्च न्यायालयाने काहीच केलं नाही, त्यावरही नरीमन यांनी चिंता व्यक्त केली आहे.
ही धोक्याची घंटी
यावेळी नरीमन यांनी निवडणूक आयुक्तांच्या नियुक्तीवरही सवाल केले आहेत. निवडणूक आयुक्तांची नियुक्ती पूर्णपणे सरकारच्या हातात देणं म्हणजे धोक्याची घंटी आहे. त्यामुळे मत देण्याचा अधिकार मोठ्या संकटात सापडला आहे. सर्वोच्च न्यायालयाने मुख्य निवडणूक आयुक्त आणि इतर निवडणूक आयुक्त अधिनियमाच्या (CEC अॅक्ट) वैधतेवर लवकर निर्णय घेतला पाहिजे, अशी मागणीही त्यांनी केली आहे.
भुइयां काय म्हणाले होते?
सुप्रीम कोर्टाचे न्यायाधीश उज्जवल भुइयां यांनीही एसआयआरवरून गंभीर चिंता व्यक्त केली होती. मृत मतदारांना वगळता, एकदा मतदान यादीत नाव सामील झाल्यावर नोटीस दिल्याशिवाय किंवा कोणत्याही सुनावणी शिवाय त्यांची नावे हटवली जाऊ शकत नाही. मतदान करणे आणि मतदार यादीत समाविष्ट होण्याच्या अधिकाराला भारतीय नागरिकाच्या आयडेंटिटीपासून वेगळं केलं जाऊ शकत नाही, असं भुइयां म्हणाले होते.
दीक्षांत समारंभात सरन्यायाधीश सूर्यकांत यांना येण्यापासून रोखणाऱ्या नालसार विद्यार्थ्यांचं भुइयां यांनी कौतुक केलं. तुम्ही देश आणि जगाला दाखवून दिलंय की, विद्यापीठाचे विद्यार्थी आणि तेही विधी शाखेचे विद्यार्थी कसे असावेत. तुम्ही हुशार आहात. निडर आहात आणि शूर आहात, अशा शब्दात त्यांनी या विद्यार्थ्यांचं कौतुक केलं.
