Who is Nidhi Tewari: कोण आहे IFS निधी? पंतप्रधान नरेंद्र मोदी यांनी बनवले खासगी सचिव

निधी तिवारी

Image Credit source: TV 9 Marathi

PM Modi Private Secretary: भारतीय परराष्ट्र सेवेतील (IFS) अधिकारी निधी तिवारी यांची पंतप्रधान नरेंद्र मोदी यांच्या खाजगी सचिवपदी नियुक्ती करण्यात आली आहे. कार्मिक मंत्रालयाच्या आदेशात ही माहिती देण्यात आली आहे. निधी तिवारी 2014 बॅचचे भारतीय परराष्ट्र सेवेतील अधिकारी आहेत. सध्या पंतप्रधान कार्यालयातच त्या उपसचिव आहेत. कार्मिक मंत्रालयाच्या आदेशात म्हटले आहे की, मंत्रिमंडळाच्या नियुक्ती समितीने निधी तिवारी यांची पंतप्रधानांचे वैयक्तीक सचिव म्हणून नियुक्ती करण्यास मान्यता दिली आहे. हा आदेश तत्काळ प्रभावाने लागू आहे. आदेशानुसार, निधी तिवारीचा पगार पे मॅट्रिक्स लेव्हल 12 नुसार निश्चित केला जाईल.

कोण आहे निधी तिवारी

निधी तिवारी 6 जानेवारी 2023 पासून पंतप्रधान कार्यालयात उपसचिव म्हणून काम करत आहे. निधी तिवारी यांनी 2013 मध्ये नागरी सेवा परीक्षेत 96 वा क्रमांक मिळविला होता. त्या वाराणसीमधील महमूरगंज येथील रहिवासी आहेत. वाराणसी 2014 पासून पंतप्रधान नरेंद्र मोदी यांचा लोकसभा मतदारसंघ आहे. 2013 मध्ये यूपीएससीची तयारी करण्यापूर्वी निधी तिवारी वाराणसीत सहायक आयुक्त होत्या. नोकरी करता करता त्यांनी यूपीएससीची तयारी केली. पंतप्रधान कार्यालयात आतापर्यंत त्या परराष्ट्र व सुरक्षा विभागात उपसचिव होत्या. त्या सरळ राष्ट्रीय सुरक्षा सल्लागार अजित डोभाल यांना रिपोर्ट करत होत्या.

काय असणार जबाबदारी

निधी तिवारी यांचे खासगी सचिव म्हणून काम खूप महत्त्वाचे असणार आहे. पंतप्रधान नरेंद्र मोदी यांच्या कार्यक्रमांचे समन्वय करणे, बैठका आयोजित करणे आणि सरकारी विभागांशी संपर्क साधण्याचे काम त्या पाहतील. यापूर्वीही अनेक महिला अधिकाऱ्यांना पीएमओमध्ये महत्त्वाच्या जबाबदाऱ्या देण्यात आल्या आहेत.

पीएमओ आणि विविध मंत्रालये, विभाग आणि इतर विभाग यांच्यातील समन्वयाचा एक महत्त्वाचा दुवा म्हणून निधी तिवारी यांच्यावर जबाबदारी असेल. धोरणात्मक निर्णयांची अंमलबजावणी आणि त्यांच्या प्रगतीवर लक्ष ठेवण्यात त्यांची भूमिका महत्त्वाची असेल. निधी तिवारी यांना पंतप्रधानांच्या खाजगी सचिवपदी बढती दिल्याने महिला सक्षमीकरणाचा संदेशही दिला गेला आहे. याशिवाय त्या पंतप्रधान मोदी यांच्या लोकसभा मतदारसंघ वाराणसी येथून त्या आल्या आहेत.