महाराष्ट्र दिनी ‘देवाभाऊ’ चष्म्याचा जगभरात डंका ! ज्याच्या त्याच्या तोंडी ‘देवाभाऊ’ चष्म्याचं कौतुक
काठमांडूत पार पडलेल्या जागतिक परिषदेत बदलापूरच्या 'देवाभाऊ' चष्म्याला जगातील सर्वात स्वस्त चष्मा म्हणून IAPB ने मान्यता दिलीये. त्यामुळं बदलापूरच्या व्हिजन फ्रेंड साकिब गोरे या सामाजिक संस्थेनं सादर केलेला 33 रुपयांचा 'देवाभाऊ' चष्मा आता अमेरिकेसह 140 देशांमध्ये पोहोचणार आहे.
अंधत्व निवारण मोहिमेअंतर्गत WHO च्या मार्गदर्शनाखाली नेपाळच्या काठमांडूत IAPB अर्थात जागतिक अंधत्व निवारण संस्थेमार्फत तीन दिवसीय शिखर परिषदेचं आयोजन करण्यात आलं होतं.
या परिषदेला 140 देशांचे 700 हून अधिक प्रतिनिधी उपस्थित होते. या परिषदेत बदलापूरच्या व्हिजन फ्रेंड साकीब गोरे या सामाजिक संस्थेनं सादर केलेला 33 रुपयांचा सर्वात स्वस्त चष्मा चर्चेचा विषय ठरला.
परिषदेसाठी आलेल्या सर्वांसाठीच हा चष्मा कुतूहलाचा विषय होता. त्यांनी व्हिजन फ्रेंड साकिब गोरे यांच्या स्टॉलला भेट देत कौतुक केलं.
IAPB अध्यक्षा कॅरोलीन केसी, सीईओ पीटर हॉलंड, युनायटेड नेशन्सचे ॲम्बेसिडर वेबसन, WHO चे स्टुअर्ड किल यांनी साकीब गोरे यांच्या स्टॉलला भेट देऊन देवाभाऊ चष्मा हा जगातील सर्वात स्वस्त चष्मा असल्याचं जाहीर केलं.
व्हिजन फ्रेंड साकिब गोरे या संस्थेने ३३ रुपयांपासून २६० रुपयांपर्यंत देवाभाऊ चष्म्याची सीरिज बनवली आहे. आता जगातील 140 देशांमध्ये 0.38 डॉलर, म्हणजेच 33 रुपयांमध्ये चष्मा उपलब्ध होण्याचा मार्ग मोकळा झालाय.
सध्याच्या घडीला जगभरात 1.1 अब्ज लोक चष्म्यापासून वंचित असून तळागाळातल्या लोकांपर्यंत हा चष्मा पोहचावा, या उद्देशानं साकिब गोरे यांनी संपूर्ण भारतीय बनावटीचा हा देवाभाऊ चष्मा बनवला आहे.
बदलापूरच्या व्हिजन फ्रेंड साकिब गोरे या सामाजिक संस्थेनं सादर केलेला 33 रुपयांचा 'देवाभाऊ' चष्मा आता अमेरिकेसह 140 देशांमध्ये पोहोचणार असून सर्वत्र त्याचीच चर्चा आहे.
