हा हॉरर चित्रपट एकट्याने पाहिला तर मिळायचे 10 हजार रुपये, थिएटरबाहेर उभी असायची अॅम्ब्युलन्स, Youtube वर आजही बघताना घाबरतात लोक
70 च्या दशकातील सर्वात मोठा हॉरर चित्रपट, जो एकट्याने पाहिला तर मिळायचे 10 हजार रुपये. थिएटरबाहेर उभी असायची अॅम्ब्युलन्स. आजही Youtube वर लोक बघत आहेत चित्रपट.
1970 च्या दशकात हिंदी चित्रपटसृष्टीत मोठे बदल घडत होते. एकीकडे मोठ्या स्टार्सच्या अॅक्शन आणि कौटुंबिक चित्रपटांचा बोलबाला होता तर दुसरीकडे कमी बजेटमध्ये तयार होणाऱ्या हॉरर चित्रपटांनी प्रेक्षकांमध्ये स्वतःची वेगळी ओळख निर्माण करण्यास सुरुवात केली होती.
वाढत्या बजेटमुळे छोटे निर्माते नवीन प्रयोगांच्या शोधात होते आणि अशाच काळात 1978 मध्ये प्रदर्शित झालेल्या ‘Darwaza’ या चित्रपटाने हिंदी सिनेसृष्टीत एक वेगळीच सनसनाटी निर्माण केली. जुन्या हवेल्या, दाट जंगलं आणि सुनसान ठिकाणी सहज शूटिंग करून निर्माते खर्च कमी करत असत.
महागडे सेट्स किंवा मोठी स्टारकास्ट न वापरता नवीन कलाकारांना संधी दिली जात होती. मात्र भीती निर्माण करण्यासाठी जोरदार बॅकग्राउंड म्युझिक, अंधार, अचानक समोर येणारे चेहरे आणि किंकाळ्यांचा प्रभावी वापर केला जात असे. त्यामुळे कमी खर्चात बनलेले हे चित्रपट बॉक्स ऑफिसवर मोठी कमाई करू लागले.
‘दरवाजा’ चित्रपट इतका भयानक असल्याचा दावा केला जात होता की चित्रपटाच्या वितरकांनी थेट चॅलेंज दिलं होतं. जो कोणी हा चित्रपट थिएटरमध्ये एकट्याने पाहील, त्याला 10 हजार रुपयांचं रोख बक्षीस दिलं जाईल, अशी घोषणा करण्यात आली होती. त्या काळात ही रक्कम खूप मोठी मानली जात होती. मात्र तरीही एकट्याने हा चित्रपट पाहण्याची हिंमत कोणीच दाखवली नाही.
रामसे कुटुंबातील तिसऱ्या पिढीतील दीपक रामसे आणि अमित रामसे यांनीही या किस्स्याचा उल्लेख केला होता. त्यांच्या मते, थिएटरबाहेर मुद्दाम अॅम्ब्युलन्स उभी ठेवली जायची, जेणेकरून प्रेक्षकांमध्ये भीतीचं वातावरण अधिक वाढेल. त्या काळातील सिंगल स्क्रीन थिएटरमध्ये कमी प्रकाश आणि मोठा साउंड सिस्टीम असल्याने हॉरर दृश्यांचा परिणाम आणखी तीव्र होत असे. संपूर्ण थिएटर एकाच वेळी किंचाळत असे आणि त्यामुळे वातावरण आणखी भयानक बनत असे.
कमी बजेटमध्ये बनलेल्या ‘दरवाजा’ने हे सिद्ध करून दाखवलं की भीतीदायक कथा मोठ्या स्टार्सपेक्षाही जास्त प्रभाव टाकू शकते. आजही अनेक प्रेक्षक हा चित्रपट YouTube वर पाहतात आणि त्यातील भीतीदायक दृश्यांची चर्चा करतात.
