13 वर्षांपूर्वीचं हे गाणं ऐकताच लोक धरतात ठेका, इतकं सुपरहिट की अभिनेत्रीच्या डान्सवरून नजर हटत नाही
308 मिलियन व्ह्यूज असणारं बॉलिवूडमधील सर्वात सुपरहिट गाणं, जे गेल्या 13 वर्षांपासून प्रत्येकांच्या मनावर करत आहे राज्य. आजही त्याच गाण्याचे आहेत लाखो चाहते.
बॉलिवूडमध्ये काही गाणी अशी असतात, जी केवळ त्यांच्या संगीतामुळेच नाही तर दमदार नृत्य, भव्य सादरीकरण आणि कलाकारांच्या स्टाइलमुळेही कायम स्मरणात राहतात. 2013 मध्ये प्रदर्शित झालेल्या 'धूम 3' चित्रपटातील 'कमली' हे गाणे त्यापैकीच एक मानले जाते.
प्रदर्शित होऊन दशकाहून अधिक काळ लोटल्यानंतरही या गाण्याची लोकप्रियता कायम असून आजही ते लग्नसमारंभ, स्टेज शो, डान्स स्पर्धा आणि सोशल मीडियावरील रील्समध्ये मोठ्या प्रमाणावर ऐकायला आणि पाहायला मिळते.
'नि मैं कमली कमली, नि मैं कमली कमली मेरे यार दी…' या गाण्याला प्रसिद्ध गायिका सुनिधी चौहान यांनी आवाज दिला होता. तर संगीत प्रीतम यांनी दिले असून गीतकार अमिताभ भट्टाचार्य यांनी त्याचे बोल लिहिले आहेत. पंजाबी आणि सूफी संगीताचा सुंदर मिलाफ या गाण्यात पाहायला मिळतो, त्यामुळे ते त्या काळातील सर्वाधिक गाजलेल्या गाण्यांपैकी एक ठरले.
या गाण्यात कतरिना कैफ हिने सादर केलेल्या जबरदस्त डान्स परफॉर्मन्सने प्रेक्षकांची मने जिंकली होती. तिची लवचिकता, ऊर्जा आणि अवघड नृत्यरचना आजही चाहत्यांकडून कौतुकाने पाहिली जाते. गाण्यात आमिर खान देखील झळकला होता.
धूम 3 या चित्रपटाचे दिग्दर्शन विजय कृष्ण आचार्य यांनी केले होते, तर निर्मिती आदित्य चोप्रा यांनी केली होती. या चित्रपटात आमिर खान, कतरिना कैफ, अभिषेक बच्चन आणि उदय चोप्रा प्रमुख भूमिकेत होते.
