90 च्या दशकातील या मालिकेची इतकी क्रेझ की रस्ते पडायचे ओस, दूरदर्शनसोबतच्या वादानंतर मालिका पडली बंद
90 च्या दशकातील एकमेव मालिका जिला पाहण्यासाठी रविवारी लोक सर्व काम बाजूला ठेवून टीव्ही समोर बसायचे. अनेक ठिकाणी तर या मालिकेमुळे रस्ते देखील शांत असायचे.
90 च्या दशकात दूरदर्शनवरील अनेक मालिका प्रेक्षकांच्या मनावर राज्य करत होत्या. त्यापैकी ‘चंद्रकांता’ ही मालिका आजही प्रेक्षकांच्या आठवणीत आहे.
रविवारी सकाळी ही मालिका प्रसारित होताना अनेक जण आपली कामं बाजूला ठेवून टीव्हीसमोर बसायचे. त्यामुळे मालिकेच्या वेळेत रस्तेही ओस पडायचे, अशी त्या काळातील लोकप्रियतेची आठवण सांगितली जाते.
1994 ते 1996 या काळात दूरदर्शनवर रविवारी सकाळी 9 वाजता ‘चंद्रकांता’ प्रसारित होत होती. देवकीनंदन खत्री यांच्या प्रसिद्ध कादंबरीवर आधारित या मालिकेत प्रेमकथा, साहस, रहस्य आणि तिलिस्म यांचा अनोखा मिलाफ पाहायला मिळाला.
अय्यारी आणि तिलिस्म यांसारख्या संकल्पना टीव्हीवर पाहण्याची संधी प्रेक्षकांना या मालिकेतून मिळाली. विशेष म्हणजे, बॉलिवूडचे दिवंगत अभिनेते इरफान खान यांनीही या मालिकेत काम केले होते.
मात्र, मालिकेच्या प्रसारणादरम्यान दूरदर्शनसोबतचे वाद आणि कायदेशीर अडचणी निर्माण झाल्याचे सांगितले जाते. त्यामुळे मालिकेच्या प्रसारणावर परिणाम झाला. नंतर ती पुन्हा सुरू करण्यात आली, मात्र पहिल्यासारखी लोकप्रियता मिळाली नाही.
