याला म्हणतात मैत्री, कोणताही गाजावाजा न करता या अभिनेत्याने राजपाल यादवला केली मदत, सांगितला तो किस्सा
बॉलिवूडमधील प्रसिद्ध अभिनेता ज्याने कोणताही गाजावाजा न करता राजपाल यादवला केली मदत. राजपाल यादवबाबत सांगितली कधीही न ऐकलेली गोष्ट.
Nawazuddin Siddiqui : बॉलिवूड अभिनेता नवाजुद्दीन सिद्दीकी पुन्हा एकदा आपल्या जुन्या मित्रासाठी म्हणजेच अभिनेता राजपाल यादवच्यासोबत ठामपणे उभा राहिल्याचे पाहायला मिळत आहे. सध्या वैयक्तिक आणि कायदेशीर अडचणींचा सामना करत असलेल्या राजपाल यादवला नवाजुद्दीन सिद्दीकीने कोणतीही प्रसिद्धी न करता गुपचूप आर्थिक मदत केल्याची माहिती सूत्रांकडून समोर आली आहे. विशेष बाब म्हणजे, या मदतीबाबत नवाजुद्दीने ना कोणते विधान केले, ना सोशल मीडियावर याचा गाजावाजा केला.
नवाजुद्दीन सिद्दीकी हा साध्या जीवनशैलीसाठी आणि खासगी आयुष्य लाइमलाइटपासून दूर ठेवण्याच्या स्वभावासाठी ओळखला जातो. त्याच्याशी जवळीक असलेल्या लोकांच्या मते, ही मदत केवळ मित्रत्त्व निभावण्यासाठी करण्यात आली असून त्यामागे कोणताही प्रचाराचा उद्देश नाही. ‘चांगली कामं शांतपणे करावीत’ या तत्वावर नवाजुद्दीन आजही ठाम आहे.
ही पहिलीच वेळ नाही
सूत्रांच्या माहितीनुसार, नवाजुद्दीन सिद्दीकीने यापूर्वीही राजपाल यादवला आर्थिक मदत केली आहे. काही काळापूर्वी त्याने सुमारे 10 लाख रुपयांची मदत केल्याचा दावा करण्यात आला आहे. मात्र, त्यावेळीही त्याने याचा कुठेही उल्लेख केला नाही. त्याच्या जवळच्या मंडळींच्या मते नवाजुद्दीन सिद्दीकीला अशा गोष्टींसाठी प्रसिद्धी मिळवण्यात रस नाही. मदत करणे हे त्याच्यासाठी मानवी कर्तव्य आहे प्रसिद्धीचं साधन नाही.
अलीकडे राजपाल यादवच्या अडचणींमुळे सोशल मीडियावर अनेक चर्चा सुरू होत्या. काही युजर्सनी तर थेट प्रश्न उपस्थित केला होता की, ‘अवघड काळात इंडस्ट्रीतील मित्र कुठे आहेत?’ अशा चर्चांच्या दरम्यानच ही माहिती समोर आली की, नवाजुद्दीन सिद्दीकी सतत राजपाल यादवच्या संपर्कात आहे आणि शक्य ती सर्व मदत करत आहे. चित्रपटसृष्टीतील जाणकारांच्या मते, नवाजुद्दीन सिद्दीकी हा नेहमीच आपल्या मित्रांसाठी उभा राहणारा कलाकार आहे.
राजपाल यादवच्या मोठ्या मनाचं कौतुक
एका जुन्या मुलाखतीत नवाजुद्दीन सिद्दीकीने स्वतः राजपाल यादवच्या मोठ्या मनाचं कौतुक केलं होतं. त्याने सांगितलं होतं की, जेव्हा राजपाल यादवला काम मिळायला सुरुवात झाली होती, त्या काळात तो संघर्ष करणाऱ्या कलाकारांना मनापासून मदत करत असत. नवाजुद्दीनच्या शब्दांत, ‘राजपाल यादवचं घर म्हणजे जणू लंगरच होतं. कोणीही भुकेला तिथे गेला तर त्याला जेवण मिळायचंच’. हा किस्सा दोघांमधील नातं केवळ व्यावसायिक नसून खऱ्या अर्थाने मैत्रीवर आधारित असल्याचं स्पष्ट करतो.
