Gaurav More : याला म्हणतात गरीबीची जाणीव, गौरव मोरेने फ्लॅट घेताच जॉनी लिव्हरने भेट देऊन केलं कौतुक; खांद्यावर शाल, डोक्यावर टोपी…
ज्येष्ठ विनोदी अभिनेते जॉनी लिव्हर यांनी 'महाराष्ट्राची हास्यजत्रा' फेम गौरव मोरेच्या मुंबईतील नव्या घराला नुकतीच भेट दिली. मोरे कुटुंबाने त्यांचे पारंपरिक आदरातिथ्याने स्वागत केले. गौरवने जॉनी लिव्हर यांना आपले प्रेरणास्थान मानत, आशीर्वाद घेतले. ही भावनिक भेट मोरे कुटुंबासाठी अविस्मरणीय ठरली, ज्यामुळे सर्वत्र आनंदाचे वातावरण पसरले.
ज्येष्ठ विनोदी अभिनेते जॉनी लिव्हर यांनी नुकतीच अभिनेते आणि विनोदी कलाकार गौरव मोरेच्या मुंबईतील पवई येथील नव्या घराला भेट दिली. या खास भेटीमुळे मोरे कुटुंबासाठी हा दिवस कायमचा स्मरणात राहणारा ठरला.
गौरव आणि त्यांच्या कुटुंबीयांनी जॉनी लिव्हर यांचे पारंपरिक मराठी आदरातिथ्याने आणि मनापासून स्वागत केले. 'महाराष्ट्राची हास्यजत्रा' या कार्यक्रमातून घराघरात पोहोचलेल्या गौरव याने या भेटीचा खास व्हिडिओ सोशल मीडियावर शेअर करत आपल्या भावना व्यक्त केल्या.
पोस्टमध्ये गौरव यांनी जॉनी लिव्हर यांना आपले प्रेरणास्थान म्हणत खास कॅप्शन लिहीली. प्रिय जॉनी लिवर सर आज आपले पाय आमच्या वास्तू ला लागले आणि आम्ही धन्य झालो.आम्हीच काय माझ संपूर्ण घर, येणारी पिढी,मागची पिढी सगळेच सुखावलो. तुमचा सिनेमा पाहता यावा म्हणून केलेली धडपड कधी दारात उभ राहून, तर कधी खिडकीत उभ राहून, आपले सिनेमे बघितले आहेत.आपण आमच्यासारख्या मुलांसाठी एक उर्जा आहात,आमचे गुरु आहात.खूप खूप प्रेम सर - असं गौरवने कॅप्शनमध्ये लिहीलं होतं.
घरी आल्यावर गौरव मोरेने जॉनी लिव्हर यांना मिठी मारली आणि त्यांच्या पाया पडून आशीर्वाद घेतला. विशेष म्हणजे, जॉनी लिव्हर यांनीही गौरव आणि त्यांच्या कुटुंबासाठी भेटवस्तू आणत त्यांना आनंदाचा सुखद धक्का दिला.
या पोस्टखाली अभिनेते जितेंद्र जोशींसह अनेक सेलिब्रेटींनी आनंद व्यक्त केला. अनेकांनी गौरव मोरेवर शुभेच्छांचा वर्षाव केला. त्यावर बरेच लाईक्स आणि कमेंट्सही आलेत.
