Photo : चोराचं भलतंच धाडस… पाच न्यायाधीशांच्या घरातच मारला डल्ला; अख्खं शहर हादरलं
चोरीच्या घटना दिवसागणिक वाढतच आहेत. आता तर थेट पाच न्यायाधीश आणि चार न्यायालयीन कर्मचाऱ्यांच्या घरी चोरांनी चोरी केली आहे. त्यामुळे चोरांची दहशत वाढत असल्याचं वास्तव समोर आहे... अशात कायदा व सुव्यवस्थेचा प्रश्न निर्माण होतो...
अमरावतीच्या कांतानगर मधील न्यायाधीशांच्या निवासस्थानी मध्यरात्री चोरी झाल्याची घटना समोर आल्यानंतर सर्वत्र खळबळ उडाली आहे. मिळालेल्या माहितीनुसार, पाच न्यायाधीश आणि चार न्यायालयीन कर्मचाऱ्यांच्या घरी रात्री चोरी झाल्याची घटना घडली आहे.
रिपोर्टनुसार, मध्यरात्री 2 वाजता पाच न्यायाधीश आणि चार न्यायालयीन कर्मचाऱ्यांच्या घरी रात्री चोरी झाल्याची माहिती समोर आली. नलदमयंती आणि शहानूर अपारमेंटमध्ये चोरीची घटना घडली असून चोरांनी, लाखोंचा मुद्देमाल लंपास केला आहे.
रात्री पोलीस बंदोबस्त असताना देखील चोरांनी शिरकाव केल्याने कायदा व सुव्यवस्थेचा प्रश्न याठिकाणी निर्माण होत आहे. मिळालेल्या माहितीनुसार, दोन दिवसांपूर्वी अमरावतीमध्ये एका सुवर्णकाराला लुटल्याची घटना ताजी असतानाच आता न्यायाधीशांची घर फोडल्याची घटना समोर आली आहे.
बाहेरगावी गेलेल्या न्यायाधीशांच्या घरी चोरट्यांनी चोरी केली आहे. पोलिसांकडून चोरट्यांचा शोध सुरू असून पोलिसांकडून परिसरातील सर्व सीसीटीव्ही तपासले जाणार असल्याची माहिती पोलिसांनी दिली. आता याप्रकरणी अधिक चौकशी सुरु आहे.
पोलिसांनी दिलेल्या माहितीनुसार, 'न्यायाधीश बाहेर गेले होते. घराला कुलूप असल्याने चोरांनी कुलूप तोडून चोरी केली आहे. सीसीटीव्हीमध्ये गोष्टी दिसल्या आहेत आणि त्यावर काम सुरु आहे. तीन चोरटे होते... असा अंदाज व्यक्त करण्यात येत आहे. पुढीत तपासात आता काय समोर येतं लवकरच कळेल...' असं देखील पोलीस अधिकारी म्हणाले.
