आता फक्त 200 रुपयांचेच पेट्रोल मिळणार, संभाजीनगरात मोठा निर्णय; वाचा आणखी नियम काय?
इराण इस्रायल युद्धामुळे गॅस सिलिंडरची टंचाई निर्माण झाली आहे. पेट्रोल डिझेलच्या बाबतीतही लोकांच्या मनात संभ्रमाचे वातावरण आहे. असे असतानाच आता छत्रपती संभाजीनगर जिल्हा प्रशासनाने याबाबत सविस्तर सांगितले आहे.
इराण-इस्रायल यांच्यातील युद्धामुळे अनेक ठिकाणी गॅस सिलिंडरची टंचाई निर्माण झाली आहे. आता पेट्रोल आणि डिझेलचीही कमतरता भासू शकते, असा दावा केला जातोय. त्यामुळे नागरिकांमध्ये संभ्रमाचे वातावरण आहे.
असे असतानाच छत्रपती संभाजीनगर जिल्ह्यात पेट्रोल व डिझेलचा पुरेसा साठा उपलब्ध असून इंधन टंचाईच्या अफवांवर विश्वास ठेवू नये, असे आवाहन जिल्हा प्रशासनाने केले आहे.
जिल्हा पुरवठा अधिकारी प्रवीण फुलारी यांनी याबाबत स्पष्टीकरण दिले आहे. सोशल मीडियावर पसरत असलेल्या अफवांमुळे पेट्रोल पंपांवर अनावश्यक गर्दी होत आहे, असे फुलारी म्हणाले आहेत. घाबरून जाऊ नये, असा आवाहन प्रशासनाकडून करण्यात आले आहे.
लोक पेट्रोल पंपावर अनावश्यक गर्दी करत आहेत. ही परिस्थिती टाळण्यासाठी प्रशासनाने इंधन वितरणाचे नियोजन केले आहे. त्याअंतर्गत दुचाकींना २०० रुपयांपर्यंत व चारचाकींना २००० रुपयांपर्यंत इंधन देण्याची मर्यादा ठेवण्यात आली आहे, असेही जिल्हा प्रशासनाने सांगितले आहे.
कॅन किंवा बाटल्यांमध्ये इंधन देण्यास टाळावे, तसेच रुग्णवाहिका व अत्यावश्यक सेवांना प्राधान्य दिले जाणार आहे. प्रत्येक पेट्रोल पंपावर इंधनसाठ्याची माहिती फलकावर दर्शविण्यात येणार असून नागरिकांनी शांतता राखून प्रशासनास सहकार्य करावे, असे आवाहन करण्यात आले आहे.
