भाविकांचा यंदाही महापूर… पण दानात घट; यंदा पंढरीच्या विठूरायाच्या दानपेटीत 2 कोटींची घट
Pandharpur Temple Donations : पंढरपूरच्या आषाढी वारीत यंदा 32 लाख भाविकांनी हजेरी लावली होती. मात्र यंदा विठुरायाला मिळणाऱ्या दानात तब्बल दोन कोटींची घट झाली आहे. याची आकडेवारी जाणून घेऊयात.
अलिकडेच आषाढी वारी पार पडली, राज्याच्या कानाकोपऱ्यातून वारकरी विठुरायाच्या दर्शनासाठी पंढरपुरात दाखल झाले होते. तब्बल 32 लाख भाविकांनी या यात्रेत सहभाग घेतल्याचे समोर आले आहे.
दरवर्षी प्रमाणे यंदाही भाविकांनी विठुरायाच्या चरणी मोठ्या प्रमाणात दान दिले आहे. असं असलं तरी पंढरपूर मंदिरातील दान 2 कोटींनी घटलं आहे.
यंदाच्या आषाढी यात्रेत श्री विठ्ठल-रुक्मिणी मंदिराला 8.92 कोटींचे दान मिळाले आहे. ही रक्कम मागील वर्षीच्या 10 कोटी 84 लाख रुपयांच्या तुलनेत सुमारे 1 कोटी 91 लाख रुपयांनी कमी आहे.
आषाढी यात्रा कालावधीत श्री विठ्ठल-रुक्मिणी मंदिर समितीला विविध माध्यमांतून 8 कोटी 92 लाख 72 हजार 478 रुपये उत्पन्न मिळाले. भाविकांनी रोख रक्कम, हुंडी, लाडू प्रसाद, भक्तनिवास तसेच सोने-चांदीच्या दागिन्यांच्या स्वरूपात दान केले.
मंदिर समितीकडून या निधीतून भाविकांसाठी अधिक चांगल्या सुविधा उपलब्ध करून देण्याचा प्रयत्न राहणार असल्याचे मंदिर समितीचे व्यवस्थापक प्रवीण कुमार गम यांनी सांगितले आहे.
