मराठमोळ्या संगीतकाराचा हट्ट अन् अनेकांच्या विरोधानंतर जन्माला आलेलं गाणं, नंतर ठरलं Love story आयकॉन
प्रत्येक कलाकृतीचा एक वेगळाच इतिहास असतो. विशेष म्हणजे मराठी गाण्यांमध्ये अनेक अर्थ, अनेक किस्से दडलेले असतात. असंच एक गाणं आहे 'दुनियादारी' चित्रपटातील 'टीक टीक वाजते डोक्यातच हे...'. हे गाणं ज्यांना आवडतं, त्यांना या गाण्याबाबत अधिक जाणून घ्यायला आवडतं.
हे मराठी चित्रपटसृष्टीतील एक अत्यंत लोकप्रिय आणि 'लव्ह स्टोरी आयकॉन' ठरलेले गाणे आहे. हे गाणे 2013 मध्ये प्रदर्शित झालेल्या सुपरहिट 'दुनियादारी' या चित्रपटातील असून, प्रसिद्ध संगीतकार पंकज पडघन यांनी ते संगीतबद्ध केले आहे.
पंकज पडघन यांनी संगीतबद्ध केले म्हणण्यापेक्षा त्यांनी ते जिवंत केले असे म्हणण्यास हरकत नाही. त्यांच्या हट्टामुळेच हे गाणं चित्रपटात आलं आणि अजरामर बनलं.
संगीतकार पंकज पडघन यांनी या गाण्यासाठी एक वेगळाच आणि आधुनिक सांगीतिक प्रयोग करण्याचा ठाम निर्णय घेतला होता. पारंपरिक रोमँटिक गाण्यांपेक्षा काहीतरी वेगळे आणि तरुणाईला भावणारे संगीत देण्याच्या त्यांच्या या हट्टामुळेच हे गाणे जन्माला आले.
सुरुवातीला गाण्याचे बोल 'टिक टिक वाजते डोक्यात' आणि त्यातील मराठी-हिंदी शब्दांची गुंफण 'कभी जमीं, कधी नभी...' यावरून अनेकांनी साशंकता व्यक्त केली होती. असे हटके शब्द रोमँटिक गाण्यात कितपत चालतील, याबद्दल अनेकांचा विरोध होता.
दिग्दर्शक संजय जाधव यांच्या या चित्रपटात स्वप्नील जोशी आणि सई ताम्हणकर यांच्यावर चित्रित झालेले हे गाणे प्रदर्शनानंतर तुफान गाजले. सुरुवातीचा विरोध मोडून काढत या गाण्याने रेकॉर्डब्रेक लोकप्रियता मिळवली आणि आजही ते मराठीतील सर्वोत्कृष्ट रोमँटिक गाण्यांपैकी एक मानले जाते.
