लग्नानंतर नवऱ्याने सासरी राहायचं, भन्नाट रोमँटिक कॉमेडी सिनेमा; ओटीटीवर नंबर 1 वर होतोय ट्रेंड
OTT Movie: नवरा सासरी राहायला गेल्यानंतर काय काय गमतीजमती घडतात, हे पाहण्यासाठी या चित्रपटाची कल्पना नक्कीच उत्सुकता वाढवणारी आहे. वीकेंडला काहीतरी हलकं फुलकं पहायचं असेल तर हा चित्रपट एक चांगला पर्याय आहे.
ओटीटीवर सध्या रोमँटिक कॉमेडीची आवड असणाऱ्या प्रेक्षकांसाठी एक हटके पर्याय चर्चेत आहे. हा चित्रपट 21 ऑगस्टला नेटफ्लिक्स या ओटीटी प्लॅटफॉर्मवर प्रदर्शित झाला असून आधुनिक नातेसंबंध आणि लग्नानंतरच्या अपेक्षांवर त्यात विनोदी पद्धतीने भाष्य करण्यात आलंय.
या चित्रपटाची कथा पारंपरिक लग्नाच्या संकल्पनेला थोडं उलटं करून मांडते. पावी ही लोकप्रिय इन्फ्लुएन्सर आहे. लग्न झाल्यानंतर ती तिच्या माहेरचं घर सोडण्यास तयार नसते. त्यामुळे नेहमीप्रमाणे नवरी सासरी जाण्याऐवजी नवराच पत्नीच्या घरी राहायला येतो. यानंतर सुरू होतो कुटुंबातील मजेशीर गोंधळ, सांस्कृतिक मतभेद आणि नवरा-बायकोमधील नात्याची खरी परीक्षा.
चित्रपटाचा हाच वेगळा विषय त्याला इतर रोमँटिक कॉमेडीपेक्षा वेगळं बनवतो. लग्नानंतर मुलीनेच घर सोडावं, ही पारंपरिक अपेक्षा का असावी, असा प्रश्नही कथा आपल्या पद्धतीने उपस्थित करते. या चित्रपटात रोमँटिक प्रसंगांसोबतच कौटुंबिक विनोद आणि भावनिक क्षणांचाही समावेश आहे.
नेटफ्लिक्सनेही या चित्रपटाला 'फिल गुड रोमँटिक कॉमेडी' म्हणून सादर केलं आहे. या चित्रपटात राधिका सरतकुमार, योगी बाबू, एम. एस भास्कर यांसारखे कलाकार महत्त्वाच्या भूमिकांमध्ये आहेत. सोशल मीडियावर याच्या कथानकाचं आणि कलाकारांच्या अभिनयाचं कौतुक होत आहे.
या चित्रपटाचं नाव आहे 'प्यार प्रेमा कल्याणम'. 2018 मध्ये प्रदर्शित झालेल्या एलान यांच्या 'प्यार प्रमा काढल' या चित्रपटाचा हा स्पिरीच्युअल रीमेक मानला जात आहे. तुम्हा रोमँटिक कॉमेडी, कौटुंबिक गोंधळ आणि पारंपरिक लग्नाच्या कल्पनांना वेगळ्या पद्धतीने मांडणाऱ्या कथा आवडत असतील तर हा चित्रपट एक चांगला पर्याय ठरू शकतो.
