Samantha Ruth Prabhu: कुर्रर्र… समंथा रुथ प्रभूच्या घरी चिमुकल्याचं आगमन, मुलाचं नावही केलं जाहीर
Samantha Ruth Prabhu: अभिनेत्री समंथा रुथ प्रभू आणि दिग्दर्शक राज निदिमोरू यांच्या घरी चिमुकल्या पाहुण्याचं आगमन झालं आहे. समंथाने सोशल मीडियावर फोटो पोस्ट करत चाहत्यांना ही गोड बातमी दिली आहे.

Samantha Ruth Prabhu: दाक्षिणात्य चित्रपटसृष्टीतील लोकप्रिय अभिनेत्री समंथा रुथ प्रभू हिच्या घरी चिमुकल्या पाहुण्याचं आगमन झालं आहे. समंथाने पती राज निदिमोरूसोबत पहिल्या बाळाचं स्वागत केलं असून, मुलाचा पहिला फोटो सोशल मीडियावर शेअर केला आहे. विशेष म्हणजे, या जोडप्याने आपल्या मुलाचं नावही चाहत्यांना सांगितलं आहे.
दाक्षिणात्य चित्रपटसृष्टीतील प्रसिद्ध अभिनेत्री समंथा रुथ प्रभू सध्या तिच्या वैयक्तिक आयुष्यामुळे चर्चेत आहे. समंथा आणि तिचा पती, दिग्दर्शक राज निदिमोरू यांनी त्यांच्या पहिल्या बाळाचं स्वागत केलं आहे. 19 नोव्हेंबर 2026 रोजी समंथाने गोंडस मुलाला जन्म दिला. त्यानंतर 20 नोव्हेंबर रोजी तिने सोशल मीडियावर ही आनंदाची बातमी चाहत्यांसोबत शेअर केली. या पोस्टमधून तिने बाळाचं नावही जाहीर केलं आहे.
समंथा आणि राज यांनी आपल्या मुलाचं नाव 'देव निदिमोरू' असं ठेवलं आहे. समंथाने इन्स्टाग्रामवर नवजात बाळाचा फोटो शेअर केला आहे. या फोटोसोबत तिने 'Our beautiful baby boy' असं लिहिलं आहे. तसेच 'DEV NIDIMORU' आणि 19.11.2026 अशी तारीख नमूद केली आहे. 'आमच्या आयुष्यातील हा सर्वात आनंदाचा क्षण आहे', अशा आशयाची भावनिक भावना तिने व्यक्त केली आहे. समंथाच्या या पोस्टनंतर चाहत्यांकडून आणि मनोरंजनविश्वातील अनेकांकडून तिच्यावर शुभेच्छांचा वर्षाव होत आहे.
समंथा आणि राज निदिमोरू यांनी 1 डिसेंबर 2025 रोजी कोईम्बतूरमधील ईशा योग केंद्रात खासगी समारंभात लग्न केलं होतं. या विवाहसोहळ्याला कुटुंबीय आणि मोजके जवळचे लोक उपस्थित होते. त्यानंतर दोघांच्या आयुष्यातील नव्या पर्वाची सुरुवात झाली. आता पहिल्या बाळाच्या आगमनामुळे त्यांच्या आनंदात भर पडली आहे.
समंथाने गर्भधारणेदरम्यानचा तिचा प्रवास चाहत्यांसोबत वेळोवेळी शेअर केला होता. तिने व्यायाम करतानाचे व्हिडीओ आणि फोटोही सोशल मीडियावर पोस्ट केले होते. गर्भधारणेच्या काळात शरीरातील बदलांनुसार व्यायामात बदल केल्याचंही तिने दाखवलं होतं. बाळाच्या आगमनापूर्वी समंथा आणि राज यांच्या घरी खास पूजा आयोजित करण्यात आली होती. या पूजेत दोन्ही कुटुंबांतील ज्येष्ठांनी समंथाला आणि बाळाला आशीर्वाद दिले होते.
समंथा आणि राज यांनी यापूर्वी 'द फॅमिली मॅन 2' आणि 'सिटाडेल : हनी बनी' या प्रोजेक्टमध्ये एकत्र काम केलं आहे. राज निदिमोरू हे राज आणि डीके या प्रसिद्ध दिग्दर्शक जोडीतील एक आहेत. 'फर्जी', 'गन्स अँड गुलाब्स' यांसारख्या लोकप्रिय मालिकांमुळे ते ओळखले जातात. आता व्यावसायिक आयुष्यात यशस्वी असलेल्या या जोडप्याने पालकत्वाच्या नव्या प्रवासाला सुरुवात केली आहे.
समंथाने शेअर केलेल्या या आनंदाच्या बातमीमुळे तिच्या चाहत्यांमध्ये उत्साहाचं वातावरण आहे. तिच्या मातृत्वाच्या नव्या प्रवासासाठी सोशल मीडियावर शुभेच्छा दिल्या जात आहेत