Shraddha Kapoor: बॉयफ्रेंड राहुल मोदीसोबत श्रद्धा कपूरची रोमँटिक व्हेकेशन; फोटो पाहून चाहत्यांची चर्चा
Shraddha Kapoor: अभिनेत्री श्रद्धा कपूरने इन्स्टाग्रामवर तिच्या व्हेकेशनचे फोटो पोस्ट केले आहेत. मात्र या फोटोंमध्ये राहुल मोदीच्या उपस्थितीने सर्वांचं लक्ष वेधून घेतलं आहे.
बॉलिवूड अभिनेत्री श्रद्धा कपूर तिच्या अभिनयासोबतच वैयक्तिक आयुष्यामुळेही अनेकदा चर्चेत असते. विशेषतः लेखक-दिग्दर्शक राहुल मोदीसोबतच्या तिच्या नात्याबाबत गेल्या काही काळापासून चर्चा सुरू आहे. आता श्रद्धाने सोशल मीडियावर शेअर केलेल्या काही खास फोटो आणि व्हेकेशनच्या झलकांमुळे पुन्हा एकदा त्यांच्या नात्याची चर्चा रंगली आहे.
श्रद्धाने नुकताच तिच्या छोट्याशा सुट्टीतील फोटो चाहत्यांसोबत शेअर केले आहेत. या पोस्टमध्ये तिचा निवांत आणि मजेशीर अंदाज पाहायला मिळतो. पोस्टसोबत तिने 'छोटीसी छुट्टी तो बनती है ना' असं कॅप्शन लिहिलं आहे. तिच्या या फोटो सीरिजमध्ये प्रवास, खाद्यपदार्थ, कॅफे आणि निवांत क्षणांची झलक पाहायला मिळते.
मात्र, या संपूर्ण फोटोंमध्ये सर्वाधिक लक्ष वेधून घेतलं ते राहुल मोदीच्या उपस्थितीने. एका फोटोमध्ये राहुल पुस्तक वाचताना दिसत आहे. दुसऱ्या एका क्षणात तो श्रद्धाचे फोटो क्लिक करताना दिसतो. दोघांनी एकत्र घालवलेल्या या सुट्टीतील काही खास क्षण कॅमेऱ्यात कैद झाले असून, त्यामुळे चाहत्यांमध्ये पुन्हा एकदा त्यांच्या रिलेशनशिपची चर्चा सुरू झाली आहे.
श्रद्धा आणि राहुल यांच्या जवळिकीच्या चर्चा ‘तू झूठी मैं मक्कार’ या सिनेमाच्या काळापासून सुरू झाल्या. या चित्रपटाच्या लेखन टीमचा राहुल मोदी भाग होता. त्यानंतर दोघांना अनेकदा एकत्र पाहिलं गेलं. सोशल मीडियावरील काही पोस्ट्समुळेही त्यांच्या नात्याबद्दलच्या चर्चांना अधिक हवा मिळाली.
याआधीही श्रद्धाने राहुलसोबतच्या नात्याबाबत अप्रत्यक्ष संकेत दिल्याचं बोललं गेलं आहे. त्यामुळे आता या नव्या व्हेकेशन फोटोंमुळे चाहत्यांच्या नजरा पुन्हा या जोडीकडे वळल्या आहेत. श्रद्धाने व्हेकेशनचं ठिकाण सुरुवातीला स्पष्टपणे सांगितलेलं नव्हतं; मात्र इतर रिपोर्ट्समध्ये हे फोटो थायलंड ट्रिपशी संबंधित असल्याचं नमूद करण्यात आलं आहे.
