शुभमन गिल न्यूझीलंडविरुद्धच्या 2 वनडेत खेळणार नाही… मग कर्णधार कोण?
भारतीय संघाच्या न्यूझीलंड दौऱ्यापूर्वी टीम मॅनेजमेंटकडून महत्त्वाचा निर्णय घेतला जाण्याची शक्यता आहे. भारत या दौऱ्यात 5 टी-20, 5 वनडे आणि 2 कसोटी सामने खेळणार आहे. मात्र त्यापूर्वी आता मोठा बदल होण्याची शक्यता निर्माण झाली आहे.
भारतीय संघ ऑक्टोबर-नोव्हेंबरमध्ये न्यूझीलंड दौऱ्यावर जाणार असून तिथे ५ टी-२०, ५ वनडे आणि २ कसोटी सामने खेळणार आहे. मात्र, वनडे मालिका (१५ नोव्हेंबर रोजी संपणार) आणि कसोटी मालिका (१९ नोव्हेंबरपासून सुरू) यांच्यात केवळ ३ दिवसांचे अंतर असल्याने संघासाठी ही बाब आव्हानात्मक ठरू शकते.
कसोटी मालिकेच्या तयारीसाठी आणि लाल चेंडूच्या सरावासाठी वेळ मिळावा म्हणून, वनडे संघाचा कर्णधार शुभमन गिल न्यूझीलंडविरुद्धच्या शेवटच्या दोन एकदिवसीय सामन्यांमधून विश्रांती घेण्याची शक्यता आहे.
शुभमन गिलच्या अनुपस्थितीत शेवटच्या दोन एकदिवसीय सामन्यांसाठी उपकर्णधार श्रेयस अय्यर भारतीय संघाचे नेतृत्व करू शकतो. विशेष म्हणजे, याच दौऱ्यावरील ५ सामन्यांच्या टी-२० मालिकेसाठीही अय्यरच संघाचा कर्णधार असणार आहे.
केवळ शुभमन गिलच नव्हे, तर जसप्रीत बुमराह, केएल राहुल आणि मोहम्मद सिराज यांसारखे कसोटी आणि वनडे या दोन्ही फॉरमॅटमध्ये खेळणारे महत्त्वाचे खेळाडूही कसोटी मालिकेच्या तयारीसाठी शेवटच्या दोन वनडे सामन्यांमधून बाहेर बसू शकतात.
खेळाडूंसोबतच कोचिंग स्टाफचीही विभागणी केली जाणार आहे. मुख्य प्रशिक्षक गौतम गंभीर तिसऱ्या वनडे सामन्यानंतरच कसोटी संघासोबत जोडले जातील, तर बाकीचे सहाय्यक प्रशिक्षक वनडे मालिका पूर्ण होईपर्यंत संघासोबत राहतील.
