स्पाय थ्रिलर सीरिज असावी तर अशी! गुप्तहेरांची थरारक कहाणी, त्यात सत्य घटनेची जोड; टॉप 10 मध्ये प्रेक्षकांची पसंती
Web Series: नेटफ्लिक्स या ओटीटी प्लॅटफॉर्मवर एक वर्षापूर्वी प्रदर्शित झालेल्या वेब सीरिजला आजही दमदार प्रतिसाद मिळतोय. सहा एपिसोड्सची ही स्पाय थ्रिलर सीरिज टॉप 10 मध्ये आपलं स्थान टिकवून आहे.
ओटीटीवर सध्या स्पाय थ्रिलरचा ट्रेंड पहायला मिळत आहे. अशाच वेळी अभिनेता प्रतीक गांधीची मुख्य भूमिका असलेली एक सीरिज पुन्हा चर्चेत आली आहे. नेटफ्लिक्सवर रिलीज झाल्यानंतर या सीरिजने प्रेक्षकांचं लक्ष वेधून घेतलं असून या प्लॅटफॉर्मच्या टॉप 10 यादीत स्थान मिळवण्यात ती यशस्वी ठरली होती.
ही सहा भागांची स्पाय थ्रिलर सीरिज असून तिची कथा 1970 च्या दशकाच्या पार्श्वभूमीवर आधारित आहे. प्रतीक गांधीने यात विष्णू शंकर या भारतीय गुप्तचर अधिकाऱ्याची भूमिका साकारली आहे. देशाच्या सुरक्षेसाठी पाकिस्तानमध्ये गुप्त मोहिमेवर जाणाऱ्या या अधिकाऱ्याची कथा या सीरिजमध्ये पहायला मिळते. भारताच्या अणुकार्यक्रमाला लक्ष्य करणाऱ्या पाकिस्तानच्या योजनांना रोखण्याचं आव्हान त्याच्यासमोर असतं.
या मिशनदरम्यान विष्णूला केवळ सीमेपलीकडील शूत्रंचाच सामना करावा लागत नाही, तर गुप्तहेर म्हणून आपली ओळख लपवून काम करण्याचं मोठं आव्हान असतं. त्यामुळे सीरिजमध्ये अॅक्शनपेक्षा गुप्त मोहिमा, बुद्धीचा खेळ, देशभक्ती आणि वैयक्तिक त्याग यावर अधिक भर देण्यात आला आहे.
विशेष म्हणजे या वेब सीरिजला आयएमडीबीवर दहापैकी 7.2 रेटिंग मिळालं आहे. समीक्षकांनीही प्रतीक गांधी आणि सनी हिंदुजा यांच्या अभिनयाचं कौतुक केलं आहे. त्यामुळे स्पाय थ्रिलर, गुप्तहेरांच्या कथा आणि देशाच्या सुरक्षेशी संबंधित कथानक आवडणाऱ्यांसाठी ही सीरिज एक चांगला पर्याय ठरू शकते.
या वेब सीरिजचं नाव आहे 'सारे जहाँ से अच्छा'. यामध्ये प्रतीक गांधीसोबत सनी हिंदुजा, सुहैल नय्यर, कृतिका कामरा, तिलोत्तमा शोम, रजत कपूर आणि अनुप सोनी यांसारखे कलाकार महत्त्वाच्या भूमिकेत आहेत.
