Photo Gallery : पालांवरचा पाडवा, ऊसाच्या फडात गुढी अन् ऊसतोड मजुरांचा उत्साह गगणाला भिडणारा
नांदेड : सबंध राज्यात मराठी नववर्षाचे स्वागत मोठ्या उत्साहात केले जात आहे. शहरी भागात ढोल-ताशांचा गजर, मोटार सायकलची रॅली अशा एक ना अनेक कार्यक्रमातून या नववर्षाचे स्वागत केले जात आहे. पण हा सर्व झगमगाट असावाच असे काही नाही याची बोलकी चित्र ही ऊसतोड कामगारांचा गुढी पाडवा पाहिल्यावर लक्षात येते. सणोत्सावासाठी झगमगटापेक्षा मनातला उत्साह किती महत्वाचा आहे याचा प्रत्यय नांदेडमधील ऊसतोड कामगारांकडे पाहून येतो. सकाळच्या प्रहरी पालांसमोर आकर्षक रांगोळी, गुढी उभारण्यासाठी ऊसतोड मजुरांची लगबग आणि गुढीची विधिवत पूजा यावरुनच सणाचा उत्साह काय असतो याचे दर्शन घडून येते.
विधीवत पूजा : सकाळच्या प्रहरी ऊसतोड कामगारांनी झोपडीसमोरच सर्वकाही स्वच्छ करुन हा परिसर शेणाने सारवून घेतला होता. एवढेच नाही तर आकर्षक रांगोळी काढून विधीवत पूजा करुन गुढी उभारली होती.
परस्थितीची तमा न बाळगता कामगार तल्लीन: सण - उत्सवात झगमगाट असावाच असे काही नाही. अगदी साध्या पध्दतीनेही सण कसा साजरा केला जातो याचे उदाहरण नांदेड जिल्ह्यात पाहवयास मिळाले आहे. प्रत्येक पालावरील ऊसतोड मजुरांनी अशाच प्रकारे गुढीपाडवा साजरा केला आहे.
पालांवर गुढ्यांचे दर्शन: यंदा ऊसतोड हंगाम लांबल्याने ऊसतोड कामगारांना हा गुढी पाडवा सण ऊसाच्या फडाजवळच साजरा करावा लागत आहे. असे असतानाही कामगारांनी आपल्या उत्साहामध्ये तीळभर पण कमी दाखवलेली नाही.
ऊसतोड कामगारांमध्ये उत्साह : मराठी नववर्षाचे स्वागत पालावर असताना झाले असले तरी कामगारांचा उत्साह मात्र, कायम होता. एरव्ही कोयत्याने मजबूत वार करत ऊसतोड करणाऱ्या राकट हाथांनी आज मराठी नववर्षाचे जल्लोषात स्वागत केल्याचे चित्र दिसलंय. परिस्थिती कशीही असो सण साजरे करताना मराठी माणूस कायम उत्साही असतो, हे यावरून दिसून येतंय.
