माजी खासदार, शिंदे गटाचे नेते आनंदराव अडसूळांनी प्रशासकीय अधिकाऱ्याला मारहाण केली? गुन्हा दाखल, काय आहे प्रकरण?

मुंबईः माजी खासदार आनंदराव अडसूळ (Anandrao Adsul) आणि त्यांच्या साथीदारांनी प्रशासकीय अधिकाऱ्यावर जीवघेणा हल्ला (Attack) केल्याचा गुन्हा दाखल झाला आहे. शिंदे गटाचे नेते आनंदराव अडसूळ यांच्याविरोधात मरीन लाइन्स पोलीस स्टेशनमध्ये (Police Station) तक्रार दाखल करण्यात आली होती. मंत्रालय परिसरात आकाशवाणी आमदार निवास येथे मंगळवारी रात्री अडसूळ आणि त्यांच्या साथीदारांनी जीवघेणा हल्ला केल्याचा आरोप आहे. राज्य सरकारी गट ड (चतुर्थश्रेणी) कर्मचारी मध्यवर्ती महासंघाचे अध्यक्ष भाऊसाहेब पठाण यांच्यावर हल्ला झाल्याचं तक्रारीत म्हटलं आहे.

दी महाराष्ट्र मंत्रालय को – ऑपरेटिव्ह क्रेडिट सोसायटीचे मुख्य कार्यकारी अधिकारी प्रमोद चव्हाण यांचादेखील गळा आवळण्याचा प्रयत्न आणि वरिष्ठ लिपिक संगीता मोरे यांनाही धमकावण्यात आल्याचा आरोप अडसूळ आणि त्यांच्या साथीदारांवर करण्यात आला आहे.

याप्रकरणी चतुर्थश्रेणी कर्मचा-यांनी पुढील हस्तक्षेप केल्यामुळे भाऊसाहेब पठाण थोडक्यात बचावले. तसेच पोलिसांनाही लगेच पाचारण करण्यात आल्यामुळे पुढील अनर्थ टळल्याचं तक्रारीत सांगण्यात आलं आहे.

बुधवारी सकाळी हा प्रकार समजल्यानंतर मंत्रालयातील चतुर्थश्रेणी कर्मचारी वर्गात खळबळ माजली. मुख्यमंत्री एकनाथ शिंदे यांना याप्रकरणी कारवाई करण्याचे निवेदन देण्यात आले आहे.

दरम्यान, सदर घटनेचे आज नागपुरात पडसाद उमटण्याची शक्यता आहे. नागपूर येथे विधिमंडळावर मोर्चा नेण्याचा निर्णय संतप्त कर्मचारी वर्गाने घेतला आहे.

दी महाराष्ट्र मंत्रालय को-ऑपरेटिव्ह क्रेडिट सोसायटीच्या संचालक मंडळाच्या नुकत्याच झालेल्या निवडणुकीत भाऊसाहेब पठाण यांच्या नेतृत्वाखालील एकता पॅनेलचे सर्व उमेदवार निवडून आले. त्याचा राग मनात ठेवून वचपा काढण्याच्या हेतूने आनंदराव अडसूळ आणि त्यांच्या साथीदारांनी हा हल्ला केल्याचं म्हटलं जातंय.

या सोसायटीत आमची युनियन असून सभासदांची वर्गणी पतपेढीच्या मार्फत भरा तसेच दोघा कर्मचा-यांची संचालक मंडळावर नियुक्ती करा, अशी मागणी करत अडसूळ यांनी पतसंस्थेत येऊन वाद घालण्यास सुरूवात केली. या पतसंस्थेचे उपाध्यक्ष या नात्याने ते दैनंदिन कामकाजाचा आढावा घेण्यासाठी संस्थेत जात असतात.

भाऊसाहेब पठाण आणि त्यांचे साथीदार दैनंदिन कामकाजाचा आढावा घेत असताना तिथे येऊन त्यांच्याशी हुज्जत घातली. त्यावेळी युनियनची वर्गणी पतसंस्थेने भरणे नियमाबाह्य आहे ते करता येणार नाही. तसेच दोघा कर्मचा-यांची संचालक मंडळावर नियुक्ती करण्याबाबत आगामी बैठकीत निर्णय घेऊ, असे सांगूनही हल्ला करण्याचा उद्देश्य असल्यामुळे आनंदराव अडसूळ यांनी काचेची बाटली भाऊसाहेब पठाण यांच्या अंगावर फेकून मारल्याचे आरोपांत म्हटले आहे.

त्यामुळे त्यांना जबरदस्त मार लागला. तसेच त्यांच्या एका सहका-याने श्री. पठाण यांच्यासमवेत असलेल्या प्रमोद चव्हाण यांचा गळा दाबला. या जीवघेण्या हल्ल्यामुळे सर्वजण हादरून गेले. त्यांनी लगेच पोलिसांना पाचारण केले आणि पोलिसांनी वेळीच पुढील अनर्थ टाळला, असे तक्रारीत म्हटले आहे.