अजित पवार यांनी बारामती तालुक्यातील कटफळमध्ये एका कार्यक्रमाला हजेरी लावली. त्यावेळी एका अधिकाऱ्यानं मास्क घातला नसल्याचं त्यांच्या लक्षात आलं. कार्यक्रम सुरु असतानाच अजित पवार यांनी त्या अधिकाऱ्याला चांगलंच खडसावलं. या कार्यक्रमात मी मुद्दाम सगळ्यांकडे पाहत होतो. तर हे महाराज विनामास्क बसलेत. बाबांनो स्वत:ची काळजी घ्या. मास्क नियमीत वापरा. तिसऱ्या लाटेच्या निमित्ताने कोरोना पुन्हा डोकाऊ पाहतोय. त्यामुळे प्रत्येकानेच काळजी घ्या, असा सल्लाही यावेळी अजित पवार यांनी दिलाय.
कोरोना काळात अनेक महत्वाचे सण, उत्सव साजरा करण्यावर निर्बंध आलेत. याबाबत खंत व्यक्त करतानाच अजित पवार यांनी जनतेची काळजी म्हणून असे निर्णय घ्यावे लागत असल्याचे नमूद केलं. पण काहीजण यावरून नाहक राजकारण करत असल्याची टीकाही त्यांनी विरोधकांवर केलीय.
कटफळ येथे ड्रोनद्वारे भूमापन सर्वेक्षण कार्यक्रमाचा शुभारंभ अजित पवार यांच्या हस्ते पार पडला. त्यावेळी अजित पवार यांनी ड्रोनद्वारे होणाऱ्या सर्वेक्षणाची प्रत्यक्ष पाहणी करत प्रात्यक्षिकासह माहिती घेतली. या प्रात्यक्षिकावेळी एक दारुडा चक्क नमस्कार घालत अजितदादांच्या पुढे आला. त्यावर अजित पवार यांनी हा तर दुपारीच चंद्रावर गेलाय असं म्हणताच पोलिस त्याला बाजूला घेऊन गेले.
या प्रकारानंतर मुख्य सभेत अजित पवार यांचे भाषण सुरु असताना स्थानिक ग्रामस्थांनी गावात दारुबंदीची मागणी केली. त्यावर अजितदादांनी थेट उपविभागीय पोलिस अधिकाऱ्यांना माझ्या तालुक्यात असले धंदे नकोत अशी सूचना केली. लोकं दुपारीच चंद्रावर जायला लागलेत. आज श्रावणी शनिवार आहे तरीही चाललंय. काहीजण व्यसनाधीन झाले की त्रास होतो.. त्यांना व्यसनापासून बाजूला ठेवायचं कामही आपण सर्वांनी केलं पाहिजे, असं आवाहनही अजित पवार यांनी यावेळी केलं.
अजित पवार यांनी अनेकदा जाहीर कार्यक्रमात पोलिसांना दारु विक्रीसह अवैध धंदे बंद कण्याचे आदेश दिले आहेत. मात्र, आज चक्क अजितदादांच्या कार्यक्रमावेळी दारुड्याची एन्ट्री झाल्यानंतर त्यांनी आपल्या खास शैलीत दारुधंद्यांवर कारवाईच्या सूचना दिल्या. सोबतच व्यसनांपासून दूर राहण्याचा सल्लाही त्यांनी आपले कार्यकर्ते आणि नागरिकांना केली.
इतर बातम्या :
‘पवार आमचे मार्गदर्शक, पण खेडमध्ये वळवळणाऱ्या किड्यांचा बंदोबस्त करु’, संजय राऊतांचा घणाघात
Ajit Pawar got angry at an officer sitting without a mask
