शिंदेंच्या कार्यक्रमात जाण्यापासून भाजप कार्यकर्त्यांना अडवलं; अंतर्गत वाद चव्हाट्यावर

मुंबई : एकनाथ शिंदे यांच्या बंडखोरीनंतर राज्यातील महाविकास आघाडी सरकार कोसळले. यांनतर राज्यात नवे शिंदे-फडणवीस सरकार सत्तेत आहे. अर्थात एकनाथ शिंदे गट भाजपच्या सोबत सत्तेत भागीदार बनला आहे. मात्र, शिंदे गट आणि भाजपमधील अंतर्गत वाद चव्हाट्यावर आला आहे.

शिंदेंच्या कार्यक्रमात जाण्यापासून भाजप कार्यकर्त्यांना अडवण्यात आल्याचा धक्कादायक प्रकार उघडकीस आला आहे. मिरा-भाईंदर येथील गानसम्राज्ञी लता मंगेशकर नाट्यगृहाच्या उद्घाटन सोहळ्यात हा प्रकार घडला आहे.

नाट्यगृहाच्या उद्घाटन कार्यक्रमासाठी आलेल्या भाजप पदाधिकाऱ्यांना पोलिसांनी गेटजवळ अडवले. यामुळे भाजप कार्यकर्त्यांनी जोरदार घोषणाबाजी केली. यामुळे कार्यक्रमस्थळी तणावाचे वातावरण होते.

मला आणि माझ्या सर्व भाजपच्या सर्व नगरसेवकांना या नाट्यगृहाच्या कार्यक्रमाचं निमंत्रण देण्यात आलेलं होते. परंतु प्रशासनाच्या चुकीमुळे या सर्व नगरसेवकांना या कार्यक्रमला जाऊ दिले नाही अशी तक्रार भाजप आमदार नरेंद्र मेहता यांनी केली आहे.

पोलिसांनी या सर्व नगरसेवकांची अडवणूक केली आहे. या प्रकरणाला सर्वस्वी प्रशासन जबाबदार असल्याचेही नरेंद्र मेहता म्हणाले.

मुख्यमंत्र्यांचं स्वागत आहे. पण, पालिका आयुक्त योग्य पद्धतीने आमच्या नगरसेवकांना वागणूक देत नसल्याचा आरोप नरेंद्र मेहता यांनी केला आहे.