Eknath Shinde : ‘आम्हीच बाळासाहेब ठाकरे यांची खरी शिवसेना व शिवसैनिक, तुमच्या धमक्यांना भीक घालत नाही’ एकनाथ शिंदेंचं प्रत्युत्तर
'12 आमदारांविरोधात कारवाईसाठी अर्ज करून तुम्ही आम्हाला अजिबात घाबरवू शकत नाही. कारण आम्हीच वंदनीय शिवसेनाप्रमुख बाळासाहेब ठाकरे यांची खरी शिवसेना व शिवसैनिक आहोत', असं ट्वीट एकनाथ शिंदे यांनी केलंय.
मुंबई : शिवसेना नेते एकनाथ शिंदे (Eknath Shinde) यांनी पुकारलेल्या बंडानंतर शिंदे यांच्यासह 12 आमदारांचे सदस्यत्व रद्द करण्याची मागणी शिवसेनेकडून करण्यात आलीय. अरविंद सावंत (Arvind Sawant) आणि अजय चौधरी यांच्या नेतृत्वात शिवसेनेच्या शिष्टमंडळानं आज विधानसभा उपाध्यक्ष नरहरी झिरवळ यांची भेट घेतली. त्यानंतर आता एकनाथ शिंदे यांनीही उद्धव ठाकरे (Uddhav Thackeray) यांना प्रत्युत्तर दिलंय. ’12 आमदारांविरोधात कारवाईसाठी अर्ज करून तुम्ही आम्हाला अजिबात घाबरवू शकत नाही. कारण आम्हीच वंदनीय शिवसेनाप्रमुख बाळासाहेब ठाकरे यांची खरी शिवसेना व शिवसैनिक आहोत’, असं ट्वीट एकनाथ शिंदे यांनी केलंय
‘कोणाला घाबरवण्याचा प्रयत्न करताय? तुमची बनवाबनवी आणि कायदा आम्हालाही कळतो! घटनेच्या 10 व्या परिशिष्टाप्रमाणे (शेड्युल) व्हीप हा विधानसभा कामकाजासाठी लागतो, बैठकीसाठी नाही. यासंदर्भात सुप्रीम कोर्टाचे असंख्य निकाल आहेत. 12 आमदारांविरोधात कारवाईसाठी अर्ज करून तुम्ही आम्हाला अजिबात घाबरवू शकत नाही. कारण आम्हीच वंदनीय शिवसेनाप्रमुख बाळासाहेब ठाकरे यांची खरी शिवसेना व शिवसैनिक आहोत. कायदाही जाणतो, त्यामुळे असल्या धमक्यांना भीक घालत नाही. तुम्ही संख्या नसताना अवैध गट तयार केला म्हणून तुमच्यावरच कारवाईची आमची मागणी आहे’, अशा शब्दात एकनाथ शिंदे यांनी पुन्हा एकदा थेट उद्धव ठाकरेंना आव्हान दिलंय. तसंच उद्धव ठाकरेंकडे असलेल्या आमदारांवरच कारवाईचा इशारा दिलाय.
12 आमदारांविरोधात कारवाईसाठी अर्ज करून तुम्ही आम्हाला अजिबात घाबरवू शकत नाही. कारण आम्हीच वंदनीय शिवसेनाप्रमुख बाळासाहेब ठाकरे यांची खरी शिवसेना व शिवसैनिक आहोत.
— Eknath Shinde – एकनाथ शिंदे (@mieknathshinde) June 23, 2022
शिवसेनेकडून शिंदे गटातील 12 बंडखोर आमदारांवर कारवाईची मागणी
बंडाळीनंतर आता बंडखोर आमदारांना धडा शिकवण्यासाठी शिवसेनेकडून खेळी करण्यात आलीय. एकनाथ शिंदे आणि समर्थक आमदार किंवा तो गट शिवसेना पक्षादेशाचं उल्लंघन करत आहेत. त्यामुळे त्यांचं विधानसभा सदस्यत्व रद्द करण्यात यावं अशी मागणी विधानसभा उपाध्यक्ष नरहरी झिरवळ यांच्याकडे करण्यात आली आहे. त्यासाठी शिवसेना खासदार अरविंद सावंत, नवनियुक्त गटनेते अजय चौधरी अजून काही आमदार आणि नेते यांच्या शिष्टमंडळानं विधानसभा उपाध्यक्षांची भेट घेटली आहे. शिवसेनेकडून एकूण 12 आमदारांच्या निलंबनाची मागणी करण्यात आली आहे.
कुणाची आमदारकी रद्द करण्याची मागणी?
>> एकनाथ शिंदे (कोपरी)
>> तानाजी सावंत (भूम-परंडा)
>> संदीपान भुमरे (औरंगाबाद शहर)
>> संजय शिरसाठ (औरंगाबाद पश्चिम)
>> अब्दुल सत्तार (सिल्लोड)
>> भरत गोगावले (महाड)
>> प्रकाश सुर्वे (मागाठाणे)
>> अनिल बाबर (सांगली)
>> बालाजी किनीकर (अंबरनाथ)
>> यामिनी जाधव (भायखळा)
>> लता सोनावणे (चोपडा)
>> महेश शिंदे (कोरेगाव)
