उद्योगपती अनंत अंबानी यांनी घेतली मुख्यमंत्री एकनाथ शिंदे यांची भेट! भेटीचं कारण काय?

मुंबई : उद्योगपती अनंत अंबानी यांनी मुख्यमंत्री एकनाथ शिंदे (Eknath Shinde) यांची भेट घेतली. शनिवारी रात्री उशिरा अनंत अंबानी (Anant Ambani) हे मुख्यमंत्र्यांचं शासकीय निवासस्थान असलेल्या वर्षा बंगल्यावर पोहोचले. यावेळी त्यांनी मुख्यमंत्री एकनाथ शिंदे यांची भेट घेऊन त्यांच्यासोबत चर्चा केली. या भेटीमागचं कारण नेमकं काय होतं, हे कळू शकलेलं नाही. मात्र अंबानी-शिंदे भेटीमुळे आता तर्क वितर्क लढवले जात आहेत.

अनंत अंबानी हे उद्योगपती मुकेश अंबानी (Mukesh Ambani) यांचे सुपुत्र आहेत. काही आठवड्यांपूर्वी एकनाथ शिंदे आणि रतन टाटा भेटदेखील झाली होती. उद्योगपतींसोबत मुख्यमंत्र्यांच्या होणाऱ्या गाठीभेटी महत्त्वपूर्ण मानल्या जात आहेत. दरम्यान, अनंत अंबानी आणि एकनाथ शिंदे यांच्या भेटीवेळी झालेल्या चर्चा गुलदस्त्यात आहे. जुलै महिन्यात एकनाथ शिंदे आणि रतन टाटा यांच्यात भेट झाली होती.

दुसरीकडे प्रसिद्ध उद्योगपती गौतम अदानी यांनी शिवसेना पक्षप्रमुख उद्धव ठाकरे यांची भेट घेतली होती. अदानी आणि ठाकरे भेटीला अवघे काही दिवस उलटले आहेत. त्यानंतर आता शनिवारी शिंदे-अंबानी यांच्यात झालेली भेट ही अनेक अर्थांनी महत्त्वाची मानली जातेय.

भेटीचं कारण काय?

अनंत अंबानी आणि मुख्यमंत्री एकनाथ शिंदे यांच्यातील भेटीचं कारण स्पष्ट होऊ शकलेलं नाही. या भेटीदरम्यान, शिंदे-अंबानी यांच्या वेगवेगळ्या मुद्द्यांवर चर्चा झाली असण्याची शक्यता वर्तवली जाते आहे. आगामी प्रकल्पांबाबत राज्य सरकारचं सहकार्य मिळावं, यासाठी ही भेट झालेली असू शकते, असा अंदाज जाणकारांनी वर्तवलाय.

वेदांता फॉक्सकॉनचा सेमीकंडक्टर प्रकल्प महाराष्ट्रातून गुजरातला गेलाय. त्यामुळे राज्यातील लाखो तरुणांचा रोजगार हिरवला गेला असल्याची टीका केली जात होती. यानंतर सुरु असलेल्या राजकीय घडामोडीत अनंत अंबानी आणि एकनाथ शिंदे भेट ही एक महत्त्वपूर्ण घडामोड मानली जातेय.