कर्नाटकचा मुख्यमंत्री कोण होणार? केंद्रातील ‘हा’ नेता ठरवणार

बंगळुरू : कर्नाटकात काँग्रेसला बहुमत मिळालं. त्यानंतर कर्नाटकच्या मुख्यमंत्रिपदी कोण विराजमान होणार? याबद्दल कर्नाटकसह देशाच्या राजकीय वर्तुळात चर्चा होतेय. दोन नावं या चर्चेच्या केंद्रस्थानी आहेत. डी के शिवकुमार आणि सिद्धरामय्या या दोघांचं नाव मुख्यमंत्रिपदासाठी चर्चेत आहे. यापैकी कुणाच्या गळ्यात कर्नाटकच्या मुख्यमंत्रिपदाची माळ पडते हे पाहणं महत्वाचं आहे. यासाठी काँग्रेसच्या केंद्रातील नेत्याकडे जबाबदारी देण्यात आली आहे.

कर्नाटकच्या मुख्यमंत्रिपदाबाबत काँग्रेसचे अध्यक्ष मल्लिकार्जुन खर्गे निर्णय घेणार आहेत. या सगळ्याची जबाबदारी खर्गेंच्या खांद्यावर देण्यात आली आहे. दरम्यान 18 मेला शपथविधी होऊ शकतो, अशी माहिती आहे.

कर्नाटकचं मुख्यमंत्री कोण होणार हे जवळपास निश्चित झाल्याचं बोललं जात आहे. सिद्धरामय्या यांच्याकडे पुन्हा एकदा मुख्यमंत्रिपदाची धुरा दिली जाऊ शकते अशी माहिती आहे. तर डी के शिवकुमार यांच्याकडे उपमुख्यमंत्रिपद दिलं जाऊ शकतं असं सांगितलं जातंय. मात्र मल्लिकार्जुन खर्गे याबाबतचा अंतिम निर्णय घेणार आहेत.

डी के शिवकुमार आणि सिद्धरामय्या या दोघांच्या समर्थकांनी भावी मुख्यमंत्री म्हणत ठिकठिकाणी पोस्टर लावले आहेत. त्यामुळे चर्चांना उधाण आलं आहे.

मल्लिकार्जुन खर्गे आज दिल्लीला जाणार आहेत. दिल्लीत ते सोनिया गांधी आणि राहुल गांधी यांच्याशी चर्चा करून कर्नाटकच्या मुख्यमंत्रिपदाबाबत निर्णय घेतील.

कर्नाटकमध्ये काँग्रेसच्या सत्ता स्थापनेसाठी माजी केंद्रीय गृहमंत्री आणि महाराष्ट्राचे माजी मुख्यमंत्री सुशीलकुमार शिंदे बंगळुरूत आहेत. सुशीलकुमार शिंदे यांच्यावर कर्नाटक सरकार स्थापनेबाबत मोठी जबाबदारी आहे.

कर्नाटकात काँग्रेसला बहुमत मिळाल्यानंतर मुख्यमंत्रिपदासाठी दोन नावं आघाडीवर आहेत. सिद्धारमैया आणि डी के शिवकुमार यांची नाव चर्चेत आहेत. सिद्धरामय्या हे कर्नाटक विधानसभेचे विरोधीपक्ष नेते राहिले आहेत. तर डीके शिवकुमार हे काँग्रेसचे प्रदेशाध्यक्ष आहेत. या दोघांमध्ये मुख्यमंत्रिपदाच्या रेस पाहायला मिळतेय. आता काँग्रेस हायकमांड कुणाच्या खांद्यावर मुख्यमंत्रिपदाची धुरा देतात हे पाहणं महत्वाचं असेल.

जी जबाबदारी मिळेल ती पार पाडणार-डी के शिवकुमार

मुख्यमंत्रिपदासाठी डी के शिवकुमार यांचं नाव चर्चेत आहे. माध्यमांशी बोलताना डी के शिवकुमार यांनी याबाबत आपली प्रतिक्रिया दिली आहे. पक्ष माझ्यावर कोणतीही जबाबदारी देईल, त्यासाठी मी तयार आहे. ती जबाबदारी स्विकारायला आणि पार पाडायला मी तयार आहे, असंही डीके शिवकुमार म्हणालेत.