राज्यात सत्ता होती तेव्हा गोट्या खेळत होता का, इम्तियाज जलील यांचा पंकजा मुंडेंना सवाल

औरंगाबाद : राज्यात पाच वर्ष सत्ता होती तेव्हा गोट्या खेळत होता का, असा प्रश्न एमआयएम खासदार इम्तियाज जलील (Imtiyaz Jaleel criticized on Pankaja Munde) यांनी भाजप नेत्या पंकजा मुंडेंना विचारला. पंकजा मुंडे यांनी आज (27 जानेवारी) औरंगाबादमध्ये मराठवाड्याच्या पाणी प्रश्नी विभागीय आयुक्त कार्यालयासमोर एक दिवसीय लाक्षणिक उपोषण केले. या उपोषणावर इम्तियाज जलील यांनी एका व्हिडीओच्या माध्यमातून सडकून टीका केली. हाच व्हिडीओ आता सोशल मीडियावर व्हायरल (Imtiyaz Jaleel criticized on Pankaja Munde) होत आहे.

इम्तियाज जलील म्हणाले, “राज्यात पाच वर्ष सत्ता होती. तेव्हा काय गोट्या खेळत होता का, त्यावेळी का या गंभीर प्रश्नांसाठी तुम्ही काही केलं नाही. सत्ता असताना काही केलं नाही, मग आता कशाला नौटंकी करता.”

“तुम्ही औरंगाबादमध्ये एकत्र आला आहात, आम्ही एवढे मुर्ख नाही किंवा जनता एवढी मुर्ख नाही. उद्या तुमचे समर्थक तुम्हाला प्रश्न विचारतील की जेव्हा सत्तेत होता तेव्हा का केलं नाही, सत्ता गेल्यावर नौटंकी कशाला”, असंही इम्तियाज जलील म्हणाले.

दरम्यान, मराठवाडा वॉटर ग्रीड सारख्या योजनेची अंमलबजावणी करणे, मराठवाड्याच्या हक्काचे पाणी, जलसंधारण, पाण्याचे संवर्धन, पिण्याचे पाणी या मुद्द्यांकडे राज्य सरकारचे लक्ष वेधण्यासाठी पंकजा मुंडेंनी आज उपोषण केले होते.

गोपीनाथ मुंडेंच्या जयंतीनिमित्त पंकजा मुंडेंनी गोपीनाथ गडावरुन आपल्या भावनांना वाट मोकळी करुन दिली होती. त्यावेळी पंकजा मुंडे यांनी मराठवाडा पाणी प्रश्नी आंदोलन छेडण्याचे संकेत दिले होते.