अनाकलनीय!… मोदींच्या विजयावर राज ठाकरेंची पहिली प्रतिक्रिया

मुंबई : लोकसभा निवडणुकीत भाजपप्रणित एनडीएने देशभरात तुफान यश मिळवलं आहे. एनडीएने 300 जागांचा टप्पा पार केला आहे. या निकालावर महाराष्ट्र नवनिर्माण सेनेचे अध्यक्ष राज ठाकरे यांनी एका शब्दात प्रतिक्रिया दिली आहे. राज ठाकरे यांनी ‘अनाकलनीय’ असे ट्वीट करत आपली प्रतिक्रिया दिली.

राज ठाकरे यांनी लोकसभा निवडणुकीत एकही उमेदवार उभा केला नव्हता. मात्र, तरीही त्यांनी राज्यभर प्रचारसभा घेतल्या आणि ‘मोदी-शाह मुक्त भारत’ अशी घोषणा दिली. पंतप्रधान नरेंद्र मोदी आणि केंद्र सरकारच्या धोरणांवर राज ठाकरे यांनी जोरदार टीका केली.

अनाकलनीय !#Verdict2019

— Raj Thackeray (@RajThackeray) May 23, 2019

‘या’ दहा ठिकाणी राज ठाकरेंच्या सभा

नांदेड, सोलापूर, इचलकरंजी, सातारा, पुणे, रायगड, पनवेल, काळाचौकी, भांडुप आणि नाशिक या ठिकाणी राज ठाकरेंच्या सभा झाल्या होत्या. मात्र, राज ठाकरेंच्या जिथे सभा झाल्या, त्यातील रायगडची जागा आघाडीकडे आली. त्यामुळे राज ठाकरे यांच्या सभांच्या प्रभाव आणि परिणामाबाबतही प्रश्न उपस्थित झाले आहेत.

राज ठाकरे यांनी ट्वीट करुन, भाजपप्रणित एनडीएच्या विजयावर प्रतिक्रिया दिली असली, तरी प्रत्यक्षात माध्यमांसमोर येऊन राज ठाकरे काय बोलतात, हे पाहणे महत्त्वाचे ठरणार आहे.