खासदार नवनीत राणा भाजपच्या संपर्कात?
अमरावतीच्या अपक्ष खासदार नवनीत राणा भाजपमध्ये प्रवेश करणार असल्याची जोरदार चर्चा सुरु आहे. त्यात राणा यांनी नुकतीच केंद्रीय गृहमंत्री अमित शाह यांची दिल्लीत भेट घेतल्याने या चर्चेला आणखी उधाण आले आहे.
मुंबई : अमरावतीच्या अपक्ष खासदार नवनीत राणा भाजपमध्ये प्रवेश करणार असल्याची जोरदार चर्चा सुरु आहे. त्यात राणा यांनी नुकतीच केंद्रीय गृहमंत्री अमित शाह यांची दिल्लीत भेट घेतल्याने या चर्चेला आणखी उधाण आले आहे. लोकसभा निवडणुकीत काँग्रेस-राष्ट्रवादीने राणा यांना अपक्ष उमेदवार म्हणून पाठिंबा दिला होता.
लोकसभेचा निकाल लागल्यानंतर काँग्रेस-राष्ट्रवादीतील नेत्यांनी भाजप प्रवेश करण्याची स्पर्धा लावली आहे की काय असा प्रश्न उपस्थित होत होता. काँग्रेसचे तत्कालीन विरोधीपक्षनेते राधाकृष्ण विखे यांनी तर थेट भाजपमध्ये प्रवेश करुन मंत्रीपदही मिळवले. दुसरीकडे राष्ट्रवादीचे नेते जयदत्त क्षीरसागर यांनी शिवसेनेत जाणे पसंत केले आहे. नवनीत राणा यांनीही पती रवी राणा यांच्यासह 21 जून रोजी शाह यांची घेतली. त्यामुळे त्यांच्या राजकीय वाटचालीविषयी तर्कवितर्क लावले जात आहेत.
नवनीत राणा यांनी मात्र, मतदारसंघातील विकासकामांसाठी शाह यांची भेट घेतल्याचे सांगितले. राणा यांचे पती आमदार रवी राणा यांनी ‘राजकारणात बदल होत राहतात’, असं सुचक वक्तव्य केलं होतं, त्यामुळे राणा यांच्या भाजप प्रवेशाच्या चर्चेला अधिक जोर चढला आहे.
लोकसभा निवडणुकीत नवनीत राणा यांनी अमरावतीतून शिवसेनेचे उमेदवार आनंदराव अडसूळ यांच्यासारख्या मोठ्या नेत्याला जवळजवळ 40,000 मतांनी हरवले आहे. 2014 च्या लोकसभा निवडणुकीत राणा राष्ट्रवादी काँग्रेसच्या अधिकृत उमेदवार होत्या. त्यावेळी अडसुळ यांनी राणांचा पराभव केला होता.
अवघ्या काही महिन्यांवर विधानसभा येऊन ठेपलेली असताना राणा यांनी भाजपमध्ये प्रवेश केल्यास काँग्रेस राष्ट्रवादीसाठी हा मोठा झटका असणार आहे. राणा यांचा अमरावतीमध्ये चांगला प्रभाव आहे. त्या जर भाजपमध्ये गेल्या तर विधानसभा निवडणुकीत काँग्रेस राष्ट्रवादीसाठी मोठे आव्हान उभे राहिल.
