‘3 सदस्यीय प्रभाग जड जाणार, भाजपसोबत युती केल्यास फायदा’, मनसे नेत्याचं मोठं विधान
मुंबई वगळता अन्य महापालिकांमध्ये 3 सदस्यीय प्रभाग जाहीर झाल्यामुळे आम्हाला जड जाणार आहे. त्यामुळे भाजपसोबत युती झाली तर त्याचा फायदा होणार आहे. भाजपसोबत गेलो तर सत्तेत सहभागी होऊन शहराचा विकास करता येणार आहे, असं वसंत मोरे यांनी टीव्ही 9 मराठीशी बोलताना म्हटलंय.
पुणे : महापालिका निवडणुकीच्या पार्श्वभूमीवर पुण्यात मोठ्या राजकीय घडामोडी पाहायला मिळत आहे. मनसे अध्यक्ष राज ठाकरे यांच्या पुणै दौऱ्यात मोठी वाढ झालीय. तसंच मनसे पदाधिकाऱ्यांमध्ये पुन्हा एकदा ऊर्जा निर्माण करण्याचं काम राज ठाकरे करत आहेत. अशावेळी पुण्यातील मनसे नेत्यांनी पुणे महापालिका निवडणुकीसाठी भाजपसोबत युती करावी, असा आग्रह धरला आहे. त्याबाबत पुण्यातील मनसेचे शहराध्यक्ष वसंत मोरे यांनी उघड प्रतिक्रिया दिली आहे. (MNS pune president Vasant More’s opinion to form an alliance with BJP)
मुंबई वगळता अन्य महापालिकांमध्ये 3 सदस्यीय प्रभाग जाहीर झाल्यामुळे आम्हाला जड जाणार आहे. त्यामुळे भाजपसोबत युती झाली तर त्याचा फायदा होणार आहे. भाजपसोबत गेलो तर सत्तेत सहभागी होऊन शहराचा विकास करता येणार आहे, असं वसंत मोरे यांनी टीव्ही 9 मराठीशी बोलताना म्हटलंय. मात्र, भाजपसोबत युती करायची की नाही याबाबतचा अंतिम निर्णय हा राज ठाकरे घेणार असल्याचंही त्यांनी सांगितलं. तसंच मनसे नेते अनिल शिरोदे आणि बाबू वागस्कर यांच्याशी याबाबत बोलणं झाल्याची माहितीही मोरे यांनी दिली आहे.
राज ठाकरे काय भूमिका घेणार?
मनसेप्रमुख राज ठाकरे यांनी नुकताच पुण्याचा दौरा केला होता. आगामी महानगरपालिका निवडणुकीसाठी पुण्यातील प्रभाग रचनेत बदल होण्याची शक्यता आहे. यादृष्टीने मनसेकडून अंतर्गत चाचपणी मोहीम सुरु आहे. यावेळी मनसे नेत्यांच्या एका गटाने आगामी निवडणुकीसाठी भाजपसोबत युती करावी, असा आग्रह धरला आहे. त्यामुळे आता राज ठाकरे काय भूमिका घेणार, हे पाहावे लागेल.
45 जागा निवडून येणारच, मनसेचा दावा
गेल्या निवडणुकीत प्रभाग रचनेमुळे पक्षाचे नगरसेवक कमी झाले असं मनसे नेते सांगतात. मात्र, शहरातील पक्ष संघटनेचा प्रभावही कमी झाला होता. आगामी 2022 च्या महापालिका निवडणुकीत मनसे सर्व जागा लढवणार आहे. त्यातील 90 जागांवर मनसेनं लक्ष केंद्रीत केल्याचं सांगतानाच 45 जागा निवडून येणारच असा दावा मनसेचे नेते करत आहेत.
मनसे पुणे मनपा स्वबळावर लढवणार का?
पुणे महानगरपालिकेच्या आगामी निवडणुकीत इतर कोणत्याही राजकीय पक्षाशी युती करायची की नाही, हा निर्णय परिस्थिती पाहून घेऊ, असे सूचक वक्तव्य मनसेप्रमुख राज ठाकर यांनी केले होते. महापालिका निवडणुकीत मनसे ‘एकला चलो रे’ असणार का, असा प्रश्न विचारण्यात आला. त्यावर राज ठाकरे यांनी फार बोलण्याचे टाळले. त्यावेळची परिस्थिती पाहून निर्णय घेऊ, असे मोघम वक्तव्य त्यांनी केले. म्हटलं तर महापालिका निवडणुकीची तयारी सुरू झाली आहे. कार्यालयाची गरज होती म्हणून नवं कार्यालय सुरू करण्यात आलं आहे. अजून निवडणुकांना वेळ आहे. सर्वच निवडणुका पुढे ढकलल्या जात आहेत. शेड्युलप्रमाणे फेब्रुवारीत निवडणुका व्हायला पाहिजे, पण पुढे काय होईल माहीत नाही, असं सांगतानाच निवडणुकीची रणनीती काय असेल हे तुम्हाला का सांगू?, असा सवाल त्यांनी एका प्रश्नावर उत्तर देताना केला होता.
पुणे महापालिकेतील पक्षीय बलाबल
भाजप – 99 राष्ट्रवादी – 42 काँग्रेस – 10 सेना – 10 मनसे – 2 एमआयएम – 1 एकूण जागा – 164
इतर बातम्या :
VIDEO : संजय राऊतांची भरसभेत घोडे लावण्याची भाषा, एक्सपर्ट असल्याचंही वक्तव्य, नेमकं काय घडलं?
MNS pune president Vasant More’s opinion to form an alliance with BJP
