आजच एक घाव दोन तुकडे होणार? मातोश्रीला धडकी भरवणारा निर्णय? सहाही खासदार पत्रकार परिषदेतूनच…

महाराष्ट्राच्या राजकारणात गेल्या काही दिवसांपासून सतत खळबळ उडाली आहे. उद्धव ठाकरे गटातील शिवसेने (UBT)मध्ये आंतरिक संघर्ष तीव्र झाला आहे. पक्षातील ६ बंडखोर खासदार शिंदे गटात सामील होण्याची शक्यता वर्तवली जात आहे. याला ‘ऑपरेशन टायगर’ असे नाव दिले गेले आहे. सूत्रांच्या माहितीनुसार, आज या ६ बंडखोर खासदारांकडून उद्धव ठाकरे गटातून (UBT) औपचारिकरित्या बाहेर पडण्याची घोषणा होण्याची शक्यता आहे. असे झाल्यास उद्धव ठाकरे यांना मोठा धक्का बसणार आहे.

बंडखोर खासदार कोण?

शिवसेने (UBT) च्या एकूण ९ खासदारांपैकी ६ खासदार बंडखोर झाले आहेत. यात संजय जाधव, भाऊसाहेब वाकचौरे, संजय देशमुख, नागेश पाटील आष्टिकर, संजय दीना पाटील आणि ओमराजे निंबाळकर या खासदारांचा समावेश असल्याचे बोलले जात आहे. आता हे सहा खासदार पत्रकार परिषद घेऊन पुढचे काय पाऊल टाकणार याकडे सर्वांचे लक्ष लागले आहे.

आज औपचारिक घोषणा होणार?

सूत्रांनी दिलेल्या माहितीच्या मते, अनेक दिवसांच्या चर्चेनंतर आज शिवसेना उद्धव बाळासाहेब ठाकरे (UBT) गटामधील फूट अधिकृतपणे जाहीर होण्याची शक्यता आहे. या ६ बंडखोर खासदारांनी संयुक्त पत्रकार परिषद घेऊन पक्ष सोडल्याचे जाहीर करण्याची तयारी केली आहे. पत्रकार परिषदेनंतर सर्व काही स्पष्ट होईल. बंडखोर खासदार पत्रकार परिषदेत लोकसभा अध्यक्षांशी झालेल्या भेटीचे व्हिडीओ आणि फोटो तसेच दिलेल्या पत्राची प्रत प्रसिद्ध करतील. त्याचबरोबर त्यांनी UBT गट सोडण्यामागची कारणेही सांगण्याची शक्यता आहे.

एकनाथ शिंदेंशी भेट

पत्रकार परिषदेनंतर हे सर्व ६ बंडखोर खासदार उपमुख्यमंत्री एकनाथ शिंदे यांची भेट घेणार असल्याची माहिती सूत्रांनी दिली आहे. ही भेट राजकीयदृष्ट्या अत्यंत महत्त्वाची मानली जात आहे. यापूर्वी शिंदे यांनी दिल्लीत या बंडखोर खासदारांची भेट घेतली होती, ज्यामुळे समीकरणे बदलण्याच्या चर्चांना बळ मिळाले होते.

खासदार ओमराजे निंबाळकरांची भूमिका अस्पष्ट

खासदार ओमराजे निंबाळकर यांचे वडील पवनराजे निंबाळकर यांच्या हत्या प्रकरणाबाबत कोर्टाने संशयीत आरोपींची पुराव्यांअभावी निर्दोष मुक्तता केली. त्यानंतर आता नाराज ओमराजे निंबाळकर काय निर्णय घेणार? याकडे सर्वांचे लक्ष लागले आहे. त्यांच्या निर्णयावर बऱ्याच गोष्टी अवलंबून असल्याचे चित्र दिसत आहे.