राजकीय निर्णय घेण्यापूर्वीच ओमराजे निंबाळकर भावूक, तो फोटो केला शेअर, दोन ओळीतच..

शिवसेना ठाकरे गटात मोठी बंडखोरी झाली. तब्बल 6 खासदारांनी बंडखोरी करत लोकसभा अध्यक्षांना पत्र दिले. वेगळा गट स्थापन करण्याबाबत पत्र दिले. उपमुख्यमंत्री एकनाथ शिंदे यांनी उभी फूट ठाकरेंच्या पक्षात पाडली. संजय जाधव, नागेश पाटील आष्टीकर, ओमराजे निंबाळकर यासारख्या बड्या नेत्यांनी ठाकरे गटाला राम राम ठोकल्याने मोठा धक्का बसला. खासदारांची मनधरणी सुरू आहे. कालच ओमराजे निंबाळकर यांना मोठा धक्का बसला. ओमराजे निंबाळकर यांचे वडील पवनराजे निंबाळकर यांच्या हत्याकांडाचा निकाल काल लागला. या प्रकरणातील सर्व आरोपींची निर्दाेष मुक्तता करण्यात आली. यानंतर ओमराजे निंबाळकर शिवसेना शिंदे गटात प्रवेश करणार की नाही? असा प्रश्न उपस्थित केला जात आहे. आज ओमराजे निंबाळकर निर्णय घेणार आहेत. यादरम्यानच आता खासदार ओमराजे निंबाळकर यांनी सोशल मीडियावर एक पोस्ट शेअर केली. एक व्हिडीओ त्यांनी शेअर केला, ज्यात वडिलांसोबतचा एक जुना फोटोही दिसत आहे.

यासोबतच त्यांनी कवितेतील काही महत्वपूर्ण ओळी लिहिल्या. भोवताली दाटला अंधार दु:खांचा जरी.. सुर्य सत्याचा उद्या उगवेल खात्री आहे… या अगदी मोजक्या शब्दात त्यांनी आपल्या मनातील खदखद व्यक्त केली. कालच पवनराजे निंबाळकर हत्याकांडाचा निकाल लागला आणि आज जगभरात फादर्स डे साजरा केला जात आहे. यादरम्यान ओमराजे निंबाळकर भावूक झाल्याचे दिसत आहेत.

आपल्या वडिलांसोबतचा फोटो शेअर करत त्यांनी आपल्या भावनांना वाट मोकळी करून दिली. ओमराजे निंबाळकर यांनी शिवसेना ठाकरे गटाची साथ सोडली. मात्र, त्यांनी अद्यापही आपला राजकीय निर्णय जाहीर केला नाही. 20 वर्षांपासून माझे कुटुंब न्यायसाठी संघर्ष करत आहे. मी दिल्लीच्या कोर्टात हे प्रकरण घेऊन जाणार असल्याचेही त्यांनी म्हटले.

पवनराजे निंबाळकर यांच्या हत्याकांड प्रकरणात न्याय मिळेल, अशी अपेक्षा ओमराजे निंबाळकर आणि त्यांच्या कुटुंबाला होती. मात्र, पुराव्याअभावी त्यांच्या बाजूने निकाल लागलाच नाही. यादरम्यानच आज ओमराजे निंबाळकर सायंकाळपर्यंत आपला राजकीय निर्णय घेण्याची शक्यता आहे. धाराशिवकडे सर्वांच्या नजरा लागल्या आहेत.