काँग्रेस हे भुरटे चोर, भाजपवाले डाकू आहेत : प्रकाश आंबेडकर

चंद्रपूर : “काँग्रेस म्हणजे भुरटे चोर होते, तर भाजपवाले डाकू आहे”, अशी टीका वंचित बहुजन आघाडीचे अध्यक्ष प्रकाश आंबेडकर (Prakash aambedkar Chandrapur) यांनी केली. प्रकाश आंबेडकर यांनी चंद्रपूरमधील बल्लारपुरात आयोजित केलेल्या जाहीर सभेत हे (Prakash aambedkar Chandrapur) वक्तव्य केले. “आम्हाला भाजपची बी टीम म्हणणारे काँग्रेस अगदी शेवटच्या क्षणापर्यंत आमच्याशी चर्चेची वाट बघत होते,” असा धक्कादायक खुलासाही प्रकाश आंबेडकर यांनी केला.

वंचित बहुजन आघाडीच्या उमेदवारांच्या प्रचारार्थ प्रकाश आंबेडकरांनी चंद्रपुरात सभेचे आयोजन केले होते. यावेळी त्यांनी भाषणातून काँग्रेस नेते राहुल गांधी यांच्यासह आघाडी युतीवर सडकून टीका केली.

“मुख्यमंत्री स्वत: घाबरलेले आहेत. त्यांनी वंचित आघाडी विरोधी पक्ष असेल असे भाकीत केलं होते. पण यावेळी आम्ही सत्तेत बसू आणि भाजप हा विरोधी पक्ष म्हणून काम करेल” असा घणाघातही प्रकाश आंबेडकर यांनी केला.

तसेच बँकांच्या घोटाळ्यावरही त्यांनी प्रश्नचिन्ह उपस्थित केले. “बँका कोणी चोरल्या, कोणी लुटल्या असा प्रश्न त्यांनी उपस्थिती लोकांना विचारला. त्यावेळी अनेकांनी पंतप्रधान नरेंद्र मोदी यांचं नाव घेतलं. यानंतर आंबेडकरांनी ते कोणत्या राज्याचे आहेत असे विचारले असता, गुजरात असे उपस्थिती लोकांनी उत्तर दिले. यानंतर प्रकाश आंबेडकरांनी लुटणारे हे सर्व गुजराती आहे आणि हे राज्यही गुजराती चालवत आहे. मग जर तुम्हाला तुमच्या बँकेतील पैसे सुरक्षित हवे असतील, तर भाजपला सत्तेवरुन घालवा” असेही प्रकाश आंबेडकर म्हणाले.

दरम्यान ही सभा संपल्यानंतर त्यांनी निवडणुकीसाठी आर्थिक मदतीचे आवाहन केले. या आवाहनानंतर जनतेने दानपेटीत आर्थिक मदत केली.