जिव्हाळ्याने पुढे केलेला हात भीक नव्हे, संभाजीराजेंनी अवहेलना केली : विनोद तावडे

मुंबई : कोल्हापूरकरांना भीक नको असं म्हणणाऱ्या खासदार संभाजीराजेंना (Sambhaji Chhatrapati) उच्च आणि तंत्रशिक्षणमंत्री विनोद तावडे (Vinod Tawde) यांनी उत्तर दिलं आहे. पूरग्रस्तांसाठी जिव्हाळ्याने पुढे केलेला मदतीचा हात भीक का वाटावी असा सवाल विनोद तावडे यांनी केला.

तावडे म्हणाले, “बोरिवलीमधील रिक्षावाले, फेरीवाले, मोची, किरकोळ व्यावसायिक, सामान्य नागरिक यांनी आपापल्या कुवतीनुसार १० रुपये, ५० रुपये, १०० रुपये देऊन जमा केलेला निधी म्हणजे महाराष्ट्रातील पूरग्रस्तांसाठी जिव्हाळ्याने पुढे केलेला मदतीचा हात आहे. मग ती रक्कम खासदार संभाजी राजे यांना भीक का वाटावी, असा प्रश्न मला पडला आहे. या आपत्तीच्या वेळी कोल्हापूर, सांगली आणि कोकणातील आपल्या बंधू भगिनींना मदत करण्याची सर्वसाधारण माणसाला इच्छा होती आणि त्यासाठी मंत्री असूनही मतदारसंघात फिरून यासर्वांचं प्रेम, त्यांनी देऊ केलेली मदत एकत्र करून पूरग्रस्तांसाठी पाठविली, तर याला भीक का म्हणावे, हा प्रश्न ही मदत देणार्‍या प्रत्येक माणसाला पडला आहे आणि म्हणूनच पूरग्रस्तांसाठी मदत पाठविलेल्या जनतेच्या भावनांचा अनादर होत आहे, असे मला नम्रपणे नमूद करावेसे वाटते”.

गोर-गरीब रिक्षावाले, फेरीवाले, छोटे-छोटे दुकानदार, हातावर पोट असणार्‍या माझ्या गरीब जनतेकडून जमा झालेले १०-१० रुपये मिळून ३.५० लाख रुपये आणि इतर मोठ्या देणगीदारांकडून एकत्र झालेले २४.५० लाख रुपये, अशी एकूण २८ लाखांची रक्कम फक्त बोरिवलीकरांच्यावतीने मुख्यमंत्री सहाय्यता निधीला देण्यात आली. हा आमचा खारीचा वाटा आहे, हे आम्हां सर्वांना माहीत आहे, असंही तावडेंनी नमूद केलं.

राष्ट्रवादी काँग्रेसने आमच्या या मदतफेरीचे राजकीय द्वेषापोटी विडंबन केले, हे राजकारण म्हणून मी समजू शकतो. कारण, त्यांच्याकडे आता बाकी कोणतेही मुद्दे राहिले नाहीत आणि एका विधानसभेतून पहिल्यांदाच इतका मोठ्या प्रमाणात मदतनिधी जमा होतो, हे त्यांना पहावले नसेल. पण, राष्ट्रवादी काँग्रेसच्या या राजकीय प्रचाराला संभाजीराजे यांनी बळी पडावे, याचे मला दुःख आहे.

आमच्यासारख्या शिवाजी महाराजांच्या मावळ्यांनी अडचणीत असलेल्या जनतेला आधार दिला, गोरगरिबांचे प्रेम जमा करून पूरग्रस्तांसाठी पाठविले, याचे संभाजीराजे यांनी खरेतर कौतुक करायला हवे होते. पण त्याची राजे यांनी अवहेलना केली, याची मला खंत वाटते, असं तावडे म्हणाले.

संभाजीराजे नेमकं काय म्हणाले होते?

कोल्हापूर-सांगलीच्या पूरग्रस्तांना आर्थिक सहाय्य करण्यासाठी भाजप नेते आणि सांस्कृतिक मंत्री विनोद तावडे (Vinod Tawde) यांनी मुंबईत भीक मागून मदत गोळा केली होती. तावडेंच्या या कृत्याचा राज्यसभेचे खासदार छत्रपती संभाजीराजे (Sambhaji Chhatrapati) यांनी निषेध केला आहे. स्वाभिमानी कोल्हापूरकरांना कोणाच्याही भीकेची गरज नाही, असं म्हणत संभाजीराजेंनी विनोद तावडेंना घरचा आहेर दिला आहे.

@TawdeVinod स्वाभिमानी कोल्हापूरकरांना कोणाच्या भीकेची गरज नाही. महाराष्ट्राच्या मंत्र्याला भीक मागण्याची वेळ यावी? ह्यापेक्षा दुर्दैव काय? हा व्हिडीओ आत्ताच पाहिला, इथे भीक स्वीकारली जाणार नाही. पुरग्रस्तांची क्रूर चेष्टा सहन केली जाणार नाही. pic.twitter.com/rIhGHZ52EE

— Sambhaji Chhatrapati (@YuvrajSambhaji) August 19, 2019

संबंधित बातम्या 

स्वाभिमानी कोल्हापूरकरांना कोणाची भीक नको, छत्रपती संभाजीराजेंचा विनोद तावडेंना घरचा आहेर