महिला आयोग अध्यक्षपदावर माजी IPS मीरा बोरवणकर यांची नियुक्ती होणार ?

राज्यात एकीकडे महिलांवरील अत्याचारात वाढ झाली असताना हे पद सध्या रिक्त आहे. या पदावरील रुपाली चाकणकर यांनी राजीनामा दिल्यानंतर या पदावर अजूनही कोणाची नियुक्ती केलेली नाही. त्यातच आता या पदावर माजी आयपीएस अधिकारी मीरा बोरवणकर यांच्या नावाची चर्चा सुरु असल्याचे सूत्रांनी म्हटले आहे. त्यामुळे राज्य महिला आयोगावर तडफदार आयपीएस अधिकारी मीरा बोरवणकर येणार का ? याकडे सर्वांचे लक्ष लागले आहे.

राज्य महिला आयोगाच्या पदावर माजी आयपीएस अधिकारी मीरा बोरवणकर यांची नियुक्त होणार अशी माहिती सूत्रांनी दिली आहे. मीरा बोरवणकर या कर्तव्यदक्ष आणि तडफदार महिला आयपीएस अधिकारी म्हणून ओळखल्या जातात. त्यांची या महत्वाच्या पदावर नियुक्त होणार अशी माहिती सूत्रांनी दिली आहे. राज्य महिला आयोगाचे पद गेले अनेक दिवस रिक्त आहे. राष्ट्रवादीच्या नेत्या रुपाली चाकणकर यांनी नुकताच महिला आयोगाच्या पदावरुन राजीनामा दिला आहे. भोंदूबाबा अशोक खरात याच्यासोबत रुपाली चाकणकर यांचा फोटो आल्यानंतर त्यांनी या प्रकरणात राजीनामा दिला आहे.

अधिकृत दुजोरा नाही

राज्य महिला आयोगाच्या पदी एखादी माजी आयपीएस अधिकारी नेमण्यात यावेत अशी मागणी सामाजिक कार्यकर्त्या अंजली दमानिया यांनी केली होती. त्यानंतर यावर चर्चा सुरु असतानाच आता माजी आयपीएस अधिकारी मीरा बोरवणकर यांचे नाव या पदासाठी चर्चेत असल्याचे सूत्रांनी म्हटले आहे. या संदर्भात अद्याप सरकारकडून कोणताही अधिकृत माहिती समोर आलेली नाही.

‘मॅडम कमिशनर’ मध्ये राजकारण्यांवर आरोप

मीरा बोरवणकर यांनी पुण्याच्या पोलिस आयुक्त म्हणूनही काम केले होते. त्यांनी मुंबई क्राईम ब्रँचचे नेतृत्वही केले होते. त्यांनी अलिकडेच ‘मॅडम कमिशनर’ नावाचे आत्मकथनपर पुस्तक लिहीले होते. या पुस्तकात त्यांनी तत्कालिन उपमुख्यमंत्री अजितदादा पवार यांच्यावर काही आरोप केल्याने खळबळ उडाली होती.