बीएमडब्ल्यू, पोर्शे, टोयोटो, डीएसकेंच्या 13 अलिशान गाड्यांचा लिलाव, किंमत…

पुणे : गुंतवणूकदारांचे पैसे बुडवल्याप्रकरणी जेलमध्ये असलेले बांधकाम व्यावसायिक डी एस कुलकर्णी (DSK vehicles auction) अर्थात डीएसकेंच्या गाड्यांचा लिलाव होणार आहे. डीएसकेंच्या 20 गाड्या जप्त करण्यात आल्या आहेत. त्यापैकी 13 अलिशान गाड्यांचा लिलाव (DSK vehicles auction) करण्यात येणार आहे. महत्त्वाचं म्हणजे या 13 वाहनांची किंमत 2 कोटी 86 लाख 96 हजार इतकी आहे. येत्या 15 फेब्रुवारीला हा लिलाव होणार आहे.

मावळचे प्रांत अधिकारी संदेश सिर्के यांनी या गाड्यांच्या लिलावाचे आदेश दिले आहेत. या 13 गाड्यांमध्ये बीएमडब्ल्यू, पोर्षे, टोयोटो अशा अलिशान गाड्यांचा समावेश आहे. गेल्या वर्षी ऑगस्ट महिन्यता कोर्टाने या गाड्यांच्या लिलावाला परवानगी दिली होती.  बीएमडब्ल्यू गाडीची किंमत 85 लाख रुपये आहे, तर  पोर्शे या गाडीची किंमत 75 लाख रुपये इतकी आहे.   एमव्ही ऑगस्टाची किंमत 25 लाख रुपये इतकी आहे, तर टोयाटो कॅमेराची किंमत 8 लाख रुपये इतकी आहे.

डी एस कुलकर्णींनी गुंतवणूकदारांची दोन हजार कोटींची फसवणूक केल्याचा आरोप आहे. ठेवीदारांची कोट्यवधी रुपयांची फसवणूक केल्याप्रकरणी डीएसके सध्या कारागृहात आहेत. गेल्या अनेक वर्षांपासून गुंतवणूकदार आपले पैसे मिळतील या अपेक्षेत आहेत.

डीएसके ग्रुपने ज्यादा व्याजाचे अमिष दाखवून राज्यातील हजारो ठेवीदारांची फसवणूक केल्याचा आरोप आहे. अनेक ठेवीदारांनी आर्थिक गुन्हे शाखेकडे यासंदर्भात तक्रार दिली होती. या प्रकरणी डीएसके, त्यांची पत्नी, मुलगा आणि काही नातेवाईकत सध्या तुरुंगात आहेत.

घराला घर पण देणारी माणसे, अशी जाहिरातबाजी करत गुंतवणूकदरांची साधारण दोन हजार कोटींची फसवणूक केली. या घोटाळ्याप्रकरणी डीएस कुलकर्णी यांच्यासह त्यांची पत्नी हेमांगी, मुलगा शिरीष, मेहुणी, जावई आणि इतर सहकारी तुरुंगात आहेत. तर डीएसकेंचा भाऊ मकरंद हा गुन्हा दाखल झाल्यापासून फरार झाला होता. पण ऑगस्ट 2019 मध्ये दुबईला पळून जाताना त्याला पोलिसांनी पकडलं.